Kona-bá operasaun Skylight, Alkatiri keixa Rogério Lobato, Abílio ho LUGU ba MP

Sekretáriu Jerál partidu FRETILIN, Marí Alkatiri, Sesta (18/12) mais ou menus tuku 09:30, hakat ba edifísiu Prokuradória Jerál Repúblika, Colmera Díli, hodi hato’o keixa datoluk, hasoru Timor-oan na’in haat.

Timor-oan na’in haat ne’e mak hanesan Rogério Tiago Lobato, Abílio Araújo, José Luís Guterres ‘LUGU’ no mós Abílio Araújo nia kaben Guilhermina Lobo de Araújo.

Alkatiri hateten, keixa ne’e nu’udár keixa krime difamasaun relasiona ho kazu operasaun skylight, ne’ebé Durante ne’e hamonu nia reputasaun no naran di’ak.

“Keixa krime kontra sidadaun Timorense na’in haat, hotu-hotu koñese sira Abílio Abrantes Araújo, José Luís Guterres, Rogério Lobato, ho Abílio Araújo nia kaben Guilhermina Lobo de Araújo, liga ba kazu denúnsia kalunioza liga ba skyligth”, Sekretáriu Jerál partidu FRETILIN ne’e hafoin hato’o keixa ba Ministériu Públiku (MP).

Alkatiri akresenta, kazu ne’e balun sivíl no balun krime, nune’e sira prontu atu selu indemnizasaun.

“La’ós krime de’it, maibé tanba sira iha osan, tanba prosesu sivíl mós sei tama liu husi indemnizasaun, sira la’ós laiha osan la’e, balun iha ne’e riku tebes no riku matak de’it, maibé ninia komponente sivíl indemnizasaun ne’e sei la’o”, salienta Marí.

Tuir Eis Prezidente Autoridade RAEOA ne’e, kona-bá keixa sira antes ne’e, MP dau-daun ne’e prosesa ona no sei notifika autór sira.

“Prokuradór dehan preparadu ona atu notifika agora fim do ano ou Janeiru”, termina nia. san