Konfrontu entre 77 ho IKS, PNTL detein suspeitu na’in 29

Polísia Nasionál Timor-Leste (PNTL) detein joven ne’ebé deskonfia envolve iha konfrontu  iha Luru-Mata.  Joven 29  ne’ebé deskonfia núdar  membru organizasaun arte marsiál Ikatan Kera Sakti (IKS) no arte ritual Sete-Sete (77) Polísia Nasionál Timor-Leste, Eskuadra Dom Aleixo, detein  iha Tersa (29/12/20).

Joven sira  ne’e deskonfia envolve  iha konfrontu iha área Luru-Mata Suku Fatuhada, Postu Administrátivu Dom Aleixo munisípiu Díli iha oras kalan boot wainhira komunidade deskansa.

 “Iha  dia  28 kalan mosu tentativa asaltu malu ida, entré  grupu rua Sete-Sete ho Kera Sakti, ne’ebé Polísia konsege halo kapturasaun ba ema hamutuk 29, inklui mós obejetu de krime  hanesan katana ida, rama ambon hat, fiska boraisia iha tolu,  no triplex  ne’ebé halo hanesan tamen oin no kotuk, ne’e iha ida. Kazu ne’e agora iha prosesu identifikasaun, parte investigasaun komunika hela ba iha Ministériu Públiku bele iha koñesimentu para depois hein oriéntasaun formal husi Ministériu Públiku”,Segundu Komandante PNTL munisípiu Díli Superintendente Euclides Belo, ba  jornalista sira, iha Kuartel Polísia Kaikoli Díli,hafoin detein joven hirak ne’e.

Euclides Belo apela ba komunidade sira tenke  kontribui ba kria estabilidade iha nasaun ne’e,  hodi simu loron boot tinan foun, hamutuk ho família sira.avi