LuGu: Sosiedade tomak tenke hatúr fali K-RDTL tuir nia dalan

Diplomata senior, José Luís Guterres (LuGu), hateten, relasiona ho violasaun lei-inan ne’ebé krusiál tebes ba nasaun, nune’e nia parte husu povu no sosiedade tomak atu hatúr fali konstituisaun RDTL tuir ninia dalan.

“Problema ne’ebé ohin loron ita iha relasaun ho konstituisaun da República, ita bele tuir prosesu demokrátiku ita bele hatúr fali, repoin fali konstituisaun RDTL ita nian. Ne’ebé asuntu sira ne’e la’ós Presidente da República nian, la’ós polítiku sira nian, maibé asuntu ne’e ba sosiedade tomak, povu tomak nian”, Diplomata senior ne’e iha Katedrál-Díli, Segunda (14/12/2020), hafoin partisipa semináriu nasionál ho tema “Tinan 24 Prémiu Nobel da Paz no Kompromísu Timor-Leste atu hari’i Estadu Direitu Demokrátiku, ne’ebé respeita konstituisaun no Direitus Humanus”.

Jurista Avelino Coelho, akresenta, prosesu demokratizasaun hahú moris iha tinan 1998, wainhira atu tama ba prosesu referendum, nune’e iha tinan 2002 konsege hari’i demokrasia iha Timor-Leste liu husi forma konstituisaun RDTL.

“Loke no dezenvolve wainhira hari’i CNRT iha Venezia iha 1998, ne’e loke ona prosesu demokrátiku, kultura demokrátiku, valores demokrasia, hodi nune’e iha 2002 ita aprova segundu konstituisaun”, tenik Avelino Coelho.

Maibé antes ne’e, Prezidente Repúblika (PR), Francisco Guterres “Lú Olo” liu husi ninia diskursu ba komemorasaun loron proklamasaun independénsia Timor-Leste ba da-45 katak, durante impase polítiku tinan tolu nia-laran, péritu barak interpreta lei-inan la tuir sentidu konstituisaun, nune’e hamosu diverjénsia barak iha sosiedade.

Semináriu nasionál ho tema “Tinan 24 Prémiu Nobel da Paz no Kompromísu Timor-Leste atu hari’i Estadu Direitu Demokrátiku, ne’ebé respeita konstituisaun no Direitus Humanus”, ne’e realiza husi Asosiasaun Combatente Brigada Negra (ACBN), Movimentu Brigada Xanana no mós Movimentu Nasionál Defende Konstituisaun RDTL. san