MKAE simu ona relatóriu husi CAC kona-bá kazu Díli Mart

Ministru Koordenadór Asuntu Ekonómiku, Joaquim Amaral, hateten, Ministériu Koordenadór Asuntu Ekonómiku (MKAE) simu ona relatóriu relasiona ho Díli Mart ne’ebé oferese sasán sesta bázika fuhuk no dodok ba benefisiáriu sira iha suku Comoro iha loron hirak liu ba.

“Ami simu ona relatóriu ne’ebé iha, ami haree hela no hato’o ona relatóriu ne’e ba iha superiór sira, hein katak relatóriu ne’e informasaun ne’ebé di’ak tebe-tebes kontinua hadi’a servisu la’ós de’it parte fornesedór sira órgaun fiskalizadór sira mós tenke haree hadi’a saída mak ita presiza hadi’a atu hotu-hotu hala’o nia funsaun ho proporsionál, ita hotu hanesan ajente Estadu halo servisu”, Ministru Koordenadór Asuntu Ekonómiku ne’e hodi hatán ba pergunta GMN nian iha Ai-Mutin, Díli, Segunda (14/12/2020), kona-bá Comissão Anti Corrupção (CAC) bolu obrigatóriu Diretora aprovizionamentu Ministério Turismo Comérçio e Industria (MTCI) no Adjuntu Koordenadór Programa Sesta Bázika, hodi presta deklarasaun iha edifísiu CAC, foin la-lais ne’e.

Joaquim subliña, MKAE nafatin halo koordenasaun ho ministériu implementadór sira no empreza hirak ne’ebé hetan kontratu ajuda Governu distribui sasán sesta bázika, tanba programa refere hanesan programa nasionál.

Loja hirak ne’ebé hetan kontratu husi MTCI hodi distribui sasán bázika iha kapitál Díli hamutuk 10 resin mak hanesan, Lita Store, W-Four, Leader, Díli Mart, Loja Vida, Lisun no seluk tan. ina