PM kastigu membru F-FDTL hatudu órgaun vitál iha média sosiál

Polísia Militar (PM) kastigu ona ninia membru FALINTIL-Forsa Defeza Timor-Leste (F-FDTL) ida ho inisiál TX, ne’ebé  hatudu órgaun vitál iha média sosiál.

Komandante Unidade PM F-FDTL, Majór Abel da Costa Xavier “Niki”, hateten, kastigu ne’ebé mak aplika ba membru F-FDTL ne’e, tanba uza farda hala’o gravasaun vídeo, ikus mai vídeo ne’e virál iha públiku. Hahalok ne’e hatún imajen instituisaun F-FDTL, tanba ne’e tenke kastigu.

“Tanba de’it nia tau farda ne’e nia kontra uitoan infrasaun militár, ida ne’e prosesu interna ami nian la’o, agora nia ami kastigu hela iha ami nia sela PM”, Komandante Unidade PM ne’e ba jornalista sira, Kinta (17/12/2020), hafoin hala’o enkontru ho Komando PNTL iha Kuartel Polísia Caicoli-Díli.

Majór Abel akresenta, suspeitu ne’ebé mak espalla imajen membru F-FDTL ne’e mós kaptura ona.

“Agora ema balun dehan mane fali. Agora ne’e mane mós bele halo-an sai feto, feto mós halo-an sai fali mane nia fatin. Ne’ebé hahalok ne’e hatun imajen instituisaun F-FDTL, nune’e ami kastigu ona nia, sé la hatun ami husik hela nia”, nia dehan.

Komandante Unidade PM ne’e ne’e subliña, ema ne’ebé mak komete iha kazu ne’e la’ós ohin hasa’i kedas, maibé sei prosesu.

Relasiona ho kazu  refere, membru F-FDTL ne’e hato’o ona keixa ba Polísia Sientífika Investigasaun Kriminal, hodi loke prosesu investigasaun ba kazu refere. avi