PNTL apela ba pasajeiru sira fila husi estranjeiru kumpri kuarentena

Polísia Nasionál Timor-Leste (PNTL)  apela ba pasajeiru sira husi estranjeiru mai Timor-Leste atu kumpri regra husi Ministériu Saúde, hodi  hela iha kuarentena, atu nune’e bele prevene COVID 19.

Dadauk ne’e Ministériu Saúde deteta  tan sidadaun na’in haat pozitivu ba COVID-19. Sidadaun na’in haat ne’e Timor-oan na’in tolu no sidadaun Pakistaun na’in ida.

Sidadaun Timor-oan na’in tolu ne’e hala’o viajen husi Inglaterra mai Timor-Leste no iha sintoma COVID 19 ne’e ho idade 24.

Alende ne’e sidadaun estranjeiru  pozitivu ba COVID-19 ne’e  hanesan sidadaun Pakistaun no halo viajen  mai Díli ho aviaun Air Asia.

Tuir Komandante PNTL munisípiu Díli Superintendente Xefe Henrique da Costa katak, pasajeiru sira mai husi estranjeiru, tantu Timor-oan no estranjeiru balun kumpri regra husi Ministériu Saúde hodi hela iha Kuarentena, maibé balun halai diretamente ba iha uma, hodi fó ameasa ba iha komunidade sira.

Tanba ne’e, Henrique da Costa husu ba pasajeiru sira ne’ebé fila  husi estranjeiru atu koopera ho ekipa saude no seguransa  hodi lori  ba hela iha kuarentena ne’ebé mak Estadu prepara, la’ós halai liu ba subar iha uma.

“Ba  pasajeiru sira se ita kumpri regras  ho diak hatudu katak, hadomi  ita bo’ot sira nia a’an no hadomi ita boot sira ninia família no hadomi povu Timor-Leste, tanba  ita hotu hatene katak, surtu COVID-19 etapa  agora dadauk iha nasaun hotu-hotu  tau atensaun máximu ba ida ne’e no  númeru ne’e aumenta. Tanba  ne’e husu ba komunidade atu kumpri regas ne’ebé mak fó sai  iha kuarentena sira, sira  la intensaun atu estraga  ita boot sira. Husu ba alin sira atu kumpri  kuidadu ita nia a’an kuidadu mós Timor-Leste”,esplika Komandante PNTL munisípiu Díli Superintendente Xefe Henrique da Costa, ba jornalista sira Segunda (28/12//20), iha Kuartel Polísia Kaikoli Díli.avi