PNTL investiga kazu deskonfia membru polísia tiru Alexandre iha Comoro

Vise Ministru Interior (MI), António Armindo, hateten, Polísia Nasional Timor-Leste (PNTL) halo hela investigasaun ba kazu deskonfia membru PNTL tiru kanek vítima Alexandre da Cruz área Comoro.

“Sim, ita rona hela ida ne’e no komando halo hela investigasaun no relatóriu investigasaun seidauk hato’o mai, ne’ebé ita seidauk bele públika sai”, Vise MI ne’e hafoin hasoru malu ho Primeiru Ministru (PM), Taur Matan Ruak, iha Palásiu Governu, Tersa (15/12/2020).

Kazu deskonfia membru PNTL tiru kanek Alexandre da Cruz ne’e akontese iha Kuarta, loron 9, fulan Dezembru, tinan 2020, iha Ponte Comoro III.

Entretantu kona-bá  kazu membru PNTL tiru Vítima Izac dos Santos da Silva iha parte kabun no liman ne’ebé akontese iha munisípiu Liquiça, postu administrativu Maubara, suku Vavikini, iha fulan Maiu, tinan ne’e, komete husi arguidu ho naran inisiál JAD nu’udár membru Unidade Batallaun Ordem Públiku (BOP), nune’e Governante ne’e informa PNTL kontinua investiga kazu ne’e.

Arguidu JAD tuir ona prosesu Primeiru Interogatóriu (PI) no oras ne’e kumpre medida prizaun preventiva husi Tribunál Distritál Díli (TDD).

“Rua ne’e agora prosessu ne’e la’o namanas, ita hein la’o hotu tiha no pois kuandu relatóriu mai, ha’u fiar sira sei haruka ba liu Ministériu Públiku (MP) para bele foti asaun tuir mai”, dehan António. oct