PNTL prende fugetes karon-rua no detein ema na’in haat

Polísia Nasionál Timor-Leste (PNTL ) Eskuadra Cristo Rei, prende fugetes karon-rua no detein ema na’in haat.

Fugetes sira ne’e Polísia prende Kuarta (08/12/12), hamutuk 109, ne’ebé ense iha karon-rua, hodi fa’an iha merkadu Taibessi husi negosiánte feto ida.

Fugetes ne’e kompostu husi lima shoot iha 54, shoot ualu iha 16 no shoot sanulu iha 40.

Alende ne’e, Polísia kontinua prende fugetes balun iha área Bidau Saraf, hafoin ne’e, Polísia prende tan fugetes modelu ki’ik no kaptura suspeitu ne’ebé fa’an fugetes iha Surik Mas Wedalak, postu administrativu Dom Aleixo.

Suspeitu na’in rua ne’ebé fa’an fugetes lori ona ba Eskuadra Cristo Rei, hodi submete ba prosesu investigasaun, posibilidade bele detein oras 72, hodi aprejenta ba iha tribunál no sei partisipa Primeiru Interogatóriu (PI).

Suspeita ho inisiál MDF, hateten, fugetes ne’e nia sosa fali husi negosiante sira seluk, hafoin nia fa’an tutan. Fugetes nia sosa karon-rua ne’e ho folin USD 500 resin.

“Ami sosa shoot lima ne’e ho osan USD 2, fa’an fali ho folin USD 2 resin, depois delapan shoot ami fa’an ida ho folin USD 3 resin no shoot sanulu ami sosa ho folin USD 4, depois ami fa’an fila-fali ho USD 5. Ne’ebé ami sosa husi ema, fa’an fila-fali ba ema”, esplika suspeita MDF ba GMN iha Merkadu Taibessi-Díli, Tersa (08/12/2020).

Iha parte seluk mós Polísia Eskuadra Vera Cruz, liu husi servisu informasaun kaptura suspeitu na’in rua ho inisiál FABB no JADR, tanba fa’an fugetes shoot ualu iha área Motael, hodi submete ba prosesu investigasaun no posibilidade sei detein iha sela detensaun Caicoli molok aprejenta ba tribunál. avi