SIKN detein tan suspeitu na’in haat tanba ligasaun internet ilegál

Polísia Servisu Investigasaun Kriminál Nasionál (SIKN)  kaptura no detein suspeitu IT na’in haat ne’ebé deskonfia envolve iha kazu ligasaun internet ilegál iha Timor-Leste.

Suspeitu na’in  haat ne’e mak hanesan  MG, JXS, KEC, NPDA,  suspeitu na’in haat ne’e kaptura iha R2M IT Solution, Hudi- Laran, Díli, Segunda (21/12/20).

SIKN lori mós traballadór na’in haat hosi Kompañia Global Net hanesan JFGX, HIW, HBT no AM hodi halo prosesu indentifikasaun kona-ba sira nia servisu ligadu ho internet.

SIKN halo mós identifikasaun ba data center Kompañia R2M IT Solution hodi halo apriénsaun ba ekipamentu sira hanesan, no Teleport ida, Teleport simu liña internet ida, laptop rua inklui print out dadus sira ne’ebé ligadu ho prosesu fornese internet nian durante ne’e.

Ekipamentu sira ne’ebé SIKN sobu, durante ne’e kompañia utiliza hodi halo koneksaun liña internet ilegál hosi satellite Kapasific Singapura hodi fornese mai Timor-Leste.

Iha Kompañia Global nian, SIKN deteta sira uza satelite Eurostar Satelite internasionál nian ne’ebé la rejista ninia identidade iha Timor-Leste.

Durante halo investigasaun, SIKN deteta mós Kompañia R2M durante ne’e la rejistu ninia identidade iha Autoridade Nasionál Komunikasaun  hodi hetan lisensa intrnet sup lay provider.

Hafoin SIKN halo operasaun, no identifikasaun, iha Kompañia R2M ho Globat Net, parte suspeitu sira koopera hodi hatudu fatin data center kona-ba sistema fornesimentu internet ilegál hodi sobu mós ekipamentu balun.

Nune’e mós iha servisu fatin, Kompañia Global Net nian, SIKN rekolla mós dadus no apreensaun ba ekipamentu no dadus fornesimentu internet nian.

Dadadaun ne’e suspeitu sira kumpre prosesu investigasuan no sei detein iha  sela Polisia durante oras 72, molok aprezenta ba primeiru interogatoriu iha Tribunál Distritál Dili.

Antes ne’e mós SIK lori suspeitu MS ba sobu liña koneksaun internet  ilegal  ne’ebé mak fornese  husi kompaña PT Nap  iha Atambua Indonézia ba iha Kompaña Elite iha Díli liu husi torre telemor iha Postu Administrátivu Balibo munisípiu Bobonaro, hodi fornese kontinua ba iha Ministériu balun.

Nune’e mós SIK lori ona suspeitu CO Telemor ho inisiál TVB ba iha CBD 4 iha Timor-Plaza hodi halo identifikasaun no hamate koneksaun liña  transmisaun fibra ótika  éntre kompaña  Telemor  no kompaña Elite.

SIKN kaptura Prezidente ANC ho inisiál JF,  tanba  deskonfia involve  iha fornesimentu internet ilegal, husi Indonézia mai Timor-Leste.avi