TDD liberta ona eis prezidente KFP husi sela detensaun

Tribunál Distritál Díli (TDD) liu husi prosesu Primeiru interogatóriu (PI), orienta autoridade Polísia liberta eis Prezidente Komisaun Funsaun Públika (KFP) ho inisiál LP husi sela detensaun, tanba liu ona prazu oras 72, maske seidauk iha desizaun prosesu PI.

Defensór Públiku (DP), Sérgio Quintas, hateten, Ministériu Públiku (MP) akuza arguidu LP ho krime Partisipasaun Ekonómika (299) no dau-daun ne’e prosesu refere sei iha faze investigasaun husi MP.

“Ohin juíz ordena tiha ona imediata liberdade arguidu nian. Aban tuku 11:30 dadersan mak foin rona despaixu juíz nian. Sá medida koasaun mak proporsionál no adekuada aplika ba asistidu. Ohin nia bele fila, tanba prazu detensaun 72 oras hotu tiha ona tuir lei”, DP ne’e iha TDD-Mandarin, (04/11/2020).

Iha prosesu PI ne’e MP husu tribunál atu aplika medida koasaun proibisaun auzénsia, nune’e arguidu labele sai husi teritóriu, maibé parte defeza husu ba tribunál atu aplika medida ne’ebé adekuadu.

“Parte defeza intende katak, asistidu ne’e nu’udár diplomata ida nia servisu iha rai-laran no rai-liur, foin dau-daun nia halo rekerimentu ida ba MP ne’ebé nu’udár titulár ba asaun penál, rekerimentu kona-bá nia deslokasaun ba estranjeiru. Tanba dalaruma MP preokupa ho nia deslokasaun ne’e, keta nia ba rai-liur la fila-fali tan mai, ida ne’e mak MP husu rekerimentu mai tribunál kona-bá mandadu detensaun, hodi detein nian, aumenta tan medida ne’ebé todan uitoan”, termina defeza ne’e.

Prosesu PI ne’e prezide husi Juíza, Maria Solana, MP reprezenta husi Prokuradóra, Lídia Soares. san