Tribunál aplika TIR ba arguidu na’in 4 hosi kompañia R2M IT Solution

Tribunál Distritál Díli (TDD), liuhosi desizaun primeiru interrogatóriu, aplika medida koasaun Termu Identidade Rezidénsia (TIR) hasoru arguidu na’in haat, hosi kompañia Nasionál R2M IT Solution, ho inisiál MG, JXS, KEC no NPS, tanba deskonfia halo ligasaun internet illegal hosi estranjeiru mai territóriu nasionál, ne’ebé fó prejuízu ba Estadu Timor Leste.
Advogadu Privadu Manuel Tilman hateten, tribunál aplika medida koasaun TIR hasoru kliente na’in haat ne’e, tanba krime ne’ebé Ministériu Públiku imputa, laiha indísiu forte.
Enkuantu husi arguidu na’in haat ne’e, na’in ida ho inisiál KEC nu’udar sidadaun Singapura hanesan investidor, uainhira viajen ba estranjeiru tenke husu autorizasaun ba tribunál.
“Medida koasaun hanesan ohin ha’u hateten, sai em liberdade la’os prizaun preventive, Timor oan na’in tolu ne’e aprezentasaun fulan-fulan, la’os semana-semana, iha primeira segunda feira, de kada mês tuku sia dader. Klaru ke ha’u iha kliente ida ne’ebé ke mai husi Singapura, sai liberdade hotu, maibé nia atu fila ba Singapura tenke husu autorizasaun ba tribunál, tanba nia ba dala-barak, ema negosiante, ema imvestidor tenke sai dala barak ba liur, bele ba maibé tenke hetan autorizasaun husi tribunál, ne’e-duni ohin kedas nia entrega pasaporte. Medida TIR hotu, diferensa mak tenke aprezenta an ba tribunál no atu sai ba liur tenke hetan autorizasaun husi tribunál” hateten Manuel Tilman, hafoin remata audiensia PI, iha TDD, Madarin (25/12).
Ministériu Públiku (MP) akuza arguidu sira ho krime Burla Informátika Agravadu, previstu iha artigu 269, krime Brankamentu Kapitál, previstu iha artigu 313 no krime Favoresementu Pesoál previstu iha artigu 290 hotu-hotu hosi Kódigu Penál Timor-Leste.
Kompañia R2M IT Solution deskonfia halo koneksaun liña internet ilegál hosi satelite Kasific 1 husi Singapura, hodi fornese mai Timor-Leste, no kompañia ne’e mós la rejista ninia legalidade iha internasionál.
Prosesu PI ne’e, prezide husi juíz prosesu João Ribeiro, Ministériu Públiku reprezenta hosi prokuradór Matias Soares no Lídia Soares, arguidu sira hetan asisténsia legál husi advogadu privadu Manuel Tilman no Ismael Assunção Lopes. San
Add to Comments Here!!!!