AIFAESA: Konsumu produtu implika ema nia saúde krime

Produtu hirak ne’ebé konsumu husi komunidade mak afeta ba ema nia saúde, konsidera krime tuir dekretu lei artigu 214 Kódigu Penál Timor-Leste.

Koordenadór AIFAESA, Abílio Oliveira Sereno, hateten, ba produtu hirak ne’ebé empreza oferese ba konsumidór sira afeta ema nia saúde, tuir dekretu lei artigu 214 Kodígu Penál Timor-Leste, konsidera krime no Polísia Sientífika Investigasaun Kriminál (PSIK) mak iha kompeténsia submete ba Ministériu Públiku (MP), hodi halo prosesu investigasaun tuir lei ne’ebé vigora.

Relasiona ho benefisiáriu joven na’in rua ne’ebé konsumu na’an-fahi no na’an-karau lanu ne’e, tenke tama sentru saúde Comoro hodi halo tratamentu intensivu.

“Kona-bá krime PSIK iha ne’ebá para hodi haree produtu hirak ne’ebé ke iha ne’ebá, sé karik rezultadu husi teste laboratóriu hatudu katak iha buat ruma para halo joven na’in rua moras tuir ami nia haree iha artigu 214 Kódigu Penal hatete, ne’e krime, sé krime ne’e la’ós ho ami, ne’e ho PSIK ami la presiza haruka ba PSIK komu PSIK ba ona kona-bá ida ne’e PSIK mak hatene, ami la’ós MP atu halo buat ruma kona-bá krime, mak rezultadu hatete buat ruma PSIK maka hatene, tanba iha ne’e hatete kuandu produtu ita han mak iha buat ruma halo moras ne’e krime, ami laiha buat ida PSIK mak sei halo, hodi haruka ba MP”, Koordenadór AIFAESA, Abílio Oliveira Sereno ba GMN iha ninia edifísiu Matadouru-Díli, semana kotuk.

Na’an-fahi no na’an-karau ne’ebé lanu benefisiáriu rua husi aldeia Fomentu II, Suku Comoro, PSIK no Ministériu Saúde (MS) submete ona ba Laboratóriu Nasionál (LN) Bidau, iha loron 13 liu ba, hodi halo teste.

Sasán Sesta Bázika refere Governu oferese liu husi Leader Hypermarket ba benefisiáriu na’in rua ne’e iha loron 11, fulan ne’e no hafoin konsumu joven na’in rua ne’e tenke tama sentru saúde iha loron 12 liu ba, hodi halo tratamentu, tanba sente oin hala’i no muta. ina