Família Francisco Xavier husu MP prosesa autór tesi bandeira RDTL

Loron 9, fulan ne’e, família boot saudozu Francisco Xavier do Amaral, ezije ba Ministériu Públiku (MP) atu prosesa la-lais sidadaun balun ne’ebé hatudu hahalok aat no la di’ak, hodi tesi bandeira RDTL no rin husi bandeira partidu ASDT.

Porta voz família proklamadór RDTL, Frederico Magno Sarmento, hateten, aktu ne’ebé autór sira halo ne’e krime, tanba ne’e parte relevante sira presiza tau seriedade, nune’e ema hirak ne’e bele hetan kastigu.

“Família saudozu Dr. Franscisco Xavier do Amaral haree aktu ka hahalok ida ne’e konsidera nu’udár hahalok krime hasoru Estadu RDTL, ho ida ne’e ami husu ba Estadu RDTL, liu-liu ba instituisaun relevante sira atu imediatamente prosesa autór kriminozu hirak ne’e tuir lei ne’ebé vigor iha rai-lulik ida ne’e, kazu krime investiga ona husi MP ho númeru referénsia Númeru Unik Crime (NUC) 0144, 20, DINFT no NUC 0145,20, DINFT. Maibé, to’o biban ida ne’e ladauk iha prosesu kontinuasaun ba autór señór Idelfonso de Jesus no señór António de Jesus Nunes tuir lei ne’ebé mak vigor”, Porta voz família proklamadór RDTL ne’e ba GMN iha Santa Cruz-Díli, Sabádu (09/01/2020).

Frederico mós husu ba líder nasionál sira, atu tau mós atensaun ba aktu refere.

“Família saudozu Dr. Francisco Xavier do Amaral husu ba instituisaun Defeza no Seguransa, liu-liu ba líder rezisténsia hanesan maun boot Kay Rala Xanana Gusmão, maun boot Taur Matan Ruak, maun boot Lere Anan Timur no ba maluk prezioneiru polítiku iha nasaun doben ida ne’e katak, señór Idelfonso de Jesus Nunes no señór António de Jesus Nunes hala’o aktu tesi bandeira RDTL no Bandeira partidu ASDT nia rin hanesan mós ita tesi nasaun no Prezidente RDTL nia ulun, aktu hirak ne’e nu’udár krime boot hasoru nasaun soberanu RDTL ho nune’e autór krime ami konsidera sira nu’udár inimigu povu no nasaun RDTL”, nia haktuir.

Entretantu bandeira refere harí iha tinan kotuk (14/10/2020) no iha loron (31/10/2020) bandeira hirak ne’e hetan estragu. jen