Fornese internet ilegál, arguidu rua husi kompañia UNITECH submete ona ba PI

Tribunál Distritál Díli (TDD) iha Sesta (08/01) kontinua hala’o prosesu Primeiru Interogatóriu (PI) ba arguidu na’in rua husi kompañia UNITECH, ne’ebé deskonfia envolve mós iha kazu fornesimentu internet ilegál.

Arguidu ho inisiál R nu’udár sidadaun Indonézia no arguidu AMBH sidadaun Timor.

Arguidu na’in rua to’o iha TDD mais ou menus tuku 10:30 dader, akompaña husi Polísia Nasionál Sientífika Investigasaun Nasionál Kriminál (PNSIK).

Desizaun prosesu PI ne’e, adia ba loron 9, fulan Janeiru ne’e, mais ou menus tuku 09:00.

Kona-bá krime ne’ebé Ministériu Públiku (MP) imputa, parte defeza seidauk pronúnsia, tanba sei iha segredu justísa no mós seidauk iha desizaun PI.

Prosesu PI ne’e prezide husi juíz prosesu, Afonso Carmona, MP reprezenta husi prokuradór, Matias Soares no Ambrósio, arguidu na’in rua hetan asisténsia legál husi advogadu privadu, Manuel Tilman.

Arguidu na’in rua ne’e, PNSIK ezekuta mandadu detensaun husi TDD ho númeru NUC 0166/20/PNSIK, hodi rekolla mós (Power Beam-nu’udar tore atiradór ba Wi-Fi ho distánsia ne’ebé dook), ne’ebé utiliza hodi akapta liña internet husi nasaun seluk, hodi fornese ba instituisaun Estadu sira. san