Konfrontu entre GAM iha Ainaro, ema ida kanek

Porta-Voz Polísia Nasionál Timor-Leste (PNTL), Superintendente Xefe Arnaldo Araújo, informa, konfrontu entre Grupu Arte Marsiál (GAM)  ne’ebé akontese iha Ailora, Suku Foho Ailico, Postu Administrativu Hatu-Udo, Munisípiu Ainaro, rezulta ema ida kanek.

“Depois atu hateten katak, iha loron 28, fulan Janeiru, tinan ne’e, iha akontesimentu ida iha Ainaro, ne’ebé rezulta ema ida kanek, ema sira baku malu entre grupu ho grupu. Kona-bá kronolójia husi akontesimentu ne’e Polísia Investigasaun sei hala’o hela prosesu investigasaun para hatene kronolójia loloos saída mak akontese, maibé suspeitu detein ona iha Eskuadra Polísia Hatu-Udo. Vítima dau-dauk ne’e iha ona ospitál, tanba kanek iha liman no ulun, deskonfia grupu balun mak baku malu. Ha’u la mensiona grupu A no B, maibé grupu balun ne’ebé mak durante ne’e halo problema”, Porta-Voz PNTL ne’e ba jornalista sira iha Kuartel Jerál Polísia Caicoli-Díli, Sesta (29/01/2021).

Superintendente Xefe Arnaldo Araújo akresenta, durante semana ida PNTL rejista kazu asidente tráfegu ne’ebé akontese iha teritóriu Timor-laran hamutuk 25, kanek kma’an iha kazu 32 no kanek todan 6.

No totál insidente hamutuk 30, asaltu iha kazu  9, konfrontu iha 5,  ameasa ema iha kazu 2, estraga sasán iha kazu 1 no kazu arma branka 1 no violénsia doméstika iha kazu 12. avi