Lere: Kriminaliza ema tama-sai ilegál

Xefe Estadu Maiór FALINTIL-Forsa Defeza Timor-Leste(F-FDTL), Major Jenerál Lere Anan Timur, husu Governu kriminaliza ema sira ne’ebé tama sai ilegál husi liña fronteira.

Nia husu mós ba Governu atu halo medida implementasaun EE ba dasanulu ho rigorozu, liu-liu taka fronteira no husu atu kriminaliza ema sira ne’ebé hakat liu fronteira ilegalmente.

“Husu mós ba Governu tenke toma medida forte ba sira ne’ebé mak kontra orden, liu-liu ema sira ne’ebé tama ilegalmente liu husi liña fronteira, atu nune’e labele hanesan uluk-uluk kaer tiha hatama iha kuarentena no fó tan ai-han ba sira, depois husik. Segundu instituisaun rua PNTL no F-FDTL sei reforsa seguransa iha fronteira nia-laran. Agora ne’e Governu labele mamar demais, labele halimar ho situasaun COVID-19 ne’e, se mak tama ilegál pune ka kriminaliza, ne’e krime, hanesan oho ema”, Major Jenerál Lere Anan Timur ba jornalista sira hafoin enkontru ho Prezidente Repúblika, Francisco Guterres Lú-Olo, Kuarta (27/01/2021), relasiona ho pedidu Estadu Emerjénsia (EE) ba dasanulu ne’ebé Parlamentu Nasionál (PN) aprova ona.

Xefe Estadu Maiór F-FDTL ne’e, hateten, parte defeza nia preokupasaun mak tenke implementa medida ne’ebé mai husi Governu ba EE ida ne’e. Ida taka totalmente fronteira, ema ida la sai no ema ida la tama, hanesan mós iha aeroportu no portu sira taka total.

“Kuandu ilegal ruma tama husu ba inan-aman sira atu lori mai aprezenta iha autoridade Saúde. Tanba nia bele mai ona ho moras, bele mai da’et ba nia família tomak depois família da’et ba iha ema seluk. Ida ne’e la’os buat halimar, ita rona nasaun barak iha mundu ne’ebé dezevolvidu liu Timor. Ospital mós fatin la to’o ona até atu hakoi, fatin mós dalaruma klo’ot ona no ita hatene katak ita nia tradisaun kuandu ema mate ruma ita halo adat tun sa’e ba hakoi, tanis tun sa’e, mas COVID-19 kuandu kona ema ne’e o nia família o la hatene”, tenik Lere Anan Timur.

Iha loron 25, fulan ne’e, Ministériu Negósiu Estranjeiru no Kooperasaun hasa’i ona Diploma Ministérial ida hodi kontinua taka fronteira terrestre, inklui aeroportu no portu sira to’o loron 1, fulan Fevereiru.

Timor-Leste oras ne’e iha kazu ativu hamutuk 18, kazu kumulativu 68, rekuperadu 54 no ema nain 252 mak sei hein rezultadu teste. oct