PNTL sei aumenta membru iha liña fronteira

Porta-Voz Polísia Nasionál Timor-Leste (PNTL), Superintendente Xefe Arnaldo Araújo, informa, Komando PNTL sei aumenta tan membru iha liña fronteira, nune’e bele halo kontrolu di’ak liu tan ba sidadaun sira ne’ebé tama ilegalmente mai Timor-Leste.

Objetivu atu aumenta membru iha fatin refere, atu halo prevensaun ba transmisaun pandemia COVID-19, ne’ebé dau-dauk ne’e sei kontinua afeta nasaun viziñu Indonézia, tanba hamate ona sidadaun sira.

Ho nune’e atu hala’o prevensaun, Komando PNTL antes ne’e koloka ona Unidade Espesiál Polísia (UEP) hodi reforsa Unidade Patrullamentu Fronteira (UPF), maibé ema nafatin uza oportunidade tama-sai ilegalmente, tanba ne’e Komando PNTL iha sei koloka tan membru PNTL iha fronteira.

“Komando nia polítika hanoin buat sira ne’e hotu ona no sei reforsa tan nia membru balun iha fronteira ne’ebá, ida ne’e Komando nia polítika iha ona, hein iha tempu badak Komando sei realiza nia planu, hodi reforsa tan membru sira iha fronteira”, Porta-Voz PNTL ne’e ba jornalista sira iha Kuartel Jerál Polísia Caicoli-Díli, Sesta (29/01/2021).

Antes ne’e mós membru UPF simu ona kapa udan, sintu no sapatu, atu nune’e bele fasilita di’ak liu tan sira-nia servisu. avi