Subsídiu alimentar UPF aumenta ba USD 10

Komandante Jerál Polísia Nasional Timor-Leste (PNTL), Faustino da Costa, informa, Governu liu husi Ministériu Interiór (MI) hasa’e ona osan subsídiu alimentasaun ba Unidade Patrullamentu Fronteira (UPF), hodi bele hadi’a di’ak liu tan sira-nia servisu.

Antes ne’e, UPF simu subsídiu alimentasaun ho montante USD 7.50 kada loron, nune’e ho proposta husi Komandante UPF nian konsege aumenta tan hodi sa’e ba USD 10 kada loron.

“Tinan ne’e diferente uitoan ba unidade 3 ne’e nia montante la hanesan ona ho tinan sira ba kotuk katak, aumenta 2.50 sentavus, maibé prosesu ne’e la’o, ita tenke kumpre sistema orsamentu proposta husi Komandante sira mai depois mak komando hasa’e, kuandu sistema loke osan ne’e bele transfere direta ba ema idak-idak nia bankaria”, Komandante Jerál PNTL ne’e ba jornalista sira iha Palásiu Governu, Tersa (19-01-2021).

Faustino esplika, durante ne’e sira tenta kria kondisaun ne’ebé máximu ba membru UPF sira, maibé ho situasaun pandemia tenke mantein nafatin iha fronteira ho kondisaun ne’ebé iha.

“Sé agora ita sei kria uluk kondisaun mak haruka ba sera que moras ida ne’e mos hein ita iha kondisaun tiha mak nia bele tama mai, entaun ita aloka uluk membru sira depois mak komando buka esforsu kria kondisaun hodi responde ba membru sira”, tenik Komandante Jerál PNTL ne’e.

Nia relata, iha tempu badak sei aumenta postu vijilánsia iha fronteira, nune’e bele hametin liu tan seguransa ba risku sira hanesan atividade ilegál no ultrapassa fronteira. ida