TDD aplika medida aprezentasaun periódika ba arguidu husi kompañia UNITECH

Tribunál Distritál Díli (TDD) liu husi desizaun prosesu Primeiru Interogatóriu (PI) aplika medida koasaun aprezentasaun periódika hasoru arguidu ho inisiál R nu’udár sidadaun Indonézia no arguidu AMBH nu’udar Timor-oan husi kompañia UNITECH, tanba deskonfia envolve mós iha kazu fornesimentu internet ilegál.

Ho nune’e, advogadu privadu, Manuel Tilman, hateten, Ministériu Públiku (MP) nu’udar na’in ba asaun penál, maibé iha faze PI laiha indísiu forte atu aplika medida prizaun preventiva ba arguidu ou kliente na’in rua.

“Aplika medida mak aprezentasaun temporária semanál, Segunda-Segunda aprezenta iha polísia. Hanesan ne’e duni ha’u nia intendimentu, agora MP sira intende buat seluk-seluk, maibé ha’u nia intendimentu ne’e laiha indísiu forte, liu-liu MP alega buat ida naran krime dolozu, krime ida sira nian ne’e la’ós”, Advogadu Privadu ne’e hafoin remata prosesu PI iha TDD, Mandarin-Díli, Sábadu (09/01/2021).

Tilman akresenta, mezmu TDD aplika ona medida koasaun aprezentasaun periódika, maibé faze investigasaun husi MP nafatin la’o, hodi aprezenta fali iha julgamentu normál.

“Signifika katak, juíza mós deside di’ak no fundamentasaun MP ninia akuzasaun sira ne’e sei iha faze investigasaun, karik sira bele hetan kondenasaun iha julgamentu finál”, termina advogadu ne’e.

Entretantu MP akuza arguidu sira ho krime Burla Informátika Agravadu (269), Brankeamentu Kapitál (313) no Fraude Fiskal (314), hotu-hotu husi Kódigu Penál Timor-Leste.

Prosesu PI ne’e prezide husi juíz prosesu Afonso Carmona, MP reprezenta husi prokuradór Matias Soares no Ambrósio, arguidu na’in rua hetan asisténsia legál husi advogadu privadu Manuel Tilman.

Arguidu na’in rua, PNSIK ezekuta mandadu detensaun husi TDD ho númeru NUC 0166/20/PNSIK, hodi rekolla mós sasán sira (Power Beam-nu’udar tore atiradór ba Wi-Fi ho distánsia ne’ebé dook) ne’ebé uza hodi akapta liña internet husi nasaun seluk, hodi fornese ba instituisaun Estadu sira. san