Abril, Governu rekruta kandidatu foun F-FDTL

Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, informa, iha fulan Abril, tinan 2021 ne’e, Governu hahú hala’o rekrutamentu ba kandidatu membru foun F-FDTL, hamutuk atus nen.

“Ami prevé rekrutamentu ba fulan Abril, maibé mós depende ba kondisoens ne’ebé ita iha pur ezemplu fardamentu, infraestrutura problema laiha ona, agora ne’e kestaun mak fardamentu de’it, fardamentu kuandu to’o, para farda ba rekrutamentu sira, depois sira pasa, prontu sira presiza farda buat sira ne’e hotu, mas ha’u hanoin katak falta fulan rua ka tolu, tempu sei iha Governu haruka ona kompañia aranza farda ida ne’e la hatene Marsu to’o ka la’e”, Xefe Estadu Maiór F-FDTL ne’e ba jornalista sira hafoin remata enkontru ho Prezidente Repúblika (PR), Francisco Guterres Lú Olo, iha Palásiu Prezidensiál Nicolau Lobato, Bairro Pite, Díli, Kuarta (03/02/2021).

Líder máximu F-FDTL ne’e realsa, la hatene veteranu sira-nia oan iha kondisaun di’ak atu ba rekrutamentu ka la’e, tanba presiza saúde di’ak.

“Ami veteranu hakarak ami nia oan kontinua ba misaun ne’ebé ami hala’o durante tinan 24, iha ne’ebá ne’e veteranu nia lista mós iha ne’ebá, la’ós veteranu nia lista mós iha ne’ebá, agora depende hotu-hotu saúde pur ezemplu veteranu ida nia oan mak hala’i 100 metru la aguenta ne’e ita obriga nia, nia saúde la permite, ha’u hanoin katak iha ne’ebá kestaun mais tékniku, sira mak haree, sira kuandu dehan di’ak ona, ha’u mai asina de’it haruka Ministru Defeza ba hala’o to’o ona”, tenik Lere Anan Timur.

Nia salienta, dau-daun ne’e preokupasaun primeiru mak kona-bá COVID-19 ne’ebé oho ema barak iha mundu ne’e, segundu halo oinsa forsa armada bele profisionál.

“Meius laiha ita lalika ko’alia kona-bá profisionalizmu, meius laiha, ita mós la bele impoen disiplina ba ita-nia forsa sira, mas espíritu de guerilla, guerilleiru ami sira iha ne’e, ami laiha esperansa atu moris, soldadu sira mós laiha esperansa atu moris, ami impoen biar kondisaun laiha, tanba mehi mak ukun-rasik-an ne’e”, afirma Xefe Estadu Maiór F-FDTL ne’e. oly