Kazu MCS nia mate, PNTL seidauk suspeita ema ruma

Polísia Nasionál Timor-Leste (PNTL) munisípiu Díli seidauk suspeita ema ruma, ne’ebé mak envolve hodi hamate abitante MCS iha otél  Hudi-Laran.

“Ami halo  ona koordenasaun  parte  Forensik PNTL ninian, hodi hein hela parte médiku  hodi  autópsia, kuandu autópsia hotu, sira sei fó rezultadu ba iha Forensik  PNTL nian  para bele fó sai. Portanto ami komando PNTL munisípiu Díli ami labele fó sai rezultadu sedu forra husi kompeténsia ami nian. Ate a data  ita seidauk suspeita ema  hodi foti sira-nia deklarasaun, maibé submete ona matebian ba prosesu autópsia, rezultadu autópsia sei kanaliza ba parte Forensik PNTL no servisu investigasaun, kuandu orientasaun PNTL Díli simu, entaun bele halo hodi buka tan suspeitu seluk”, esplika Segundu Komandante PNTL Díli Superintendente Euclides Belo, ba GMN, Tersa (24/02/2021), iha Caicoli.

Abitante  ne’ebé mak mate  sidadaun munisípiu Aileu,  núdar funsiónariu servisu  iha Ministériu Interiór.

Matebian  submete ona ba prosesu autópsia iha Tersa (23/02/2021) no iha Kuarta (24/02/2021) lori ona matebian ba presta omenazen ikus iha Ministériu Interiór molok ba lori haloot iha simitériu Liquidoe, núdar matebian nia moris fatin ba.

Kazu MCS akontese Kuarta (17/02/2021) iha área Hudi-Laran Bairu-Pite Díli Postu Administrátivu Cristo-Rei.avi