Lere: F-FDTL deve foos-mina sustentabiliza membru nia kabun

Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál, Lere Anan Timur, deklara, besik fulan tolu ona, osan “hahán” ba militár sira laiha, obrigadu F-FDTL hodi de’it deve mak sustenta membru sira-nia kabun, durante militár sira hala’o misaun seguransa iha teritóriu nasionál, liu-liu hirak ne’ebé hala’o seguransa iha fronteira.

“Kuandu ita iha paun tomak, depois ema hasai sorin sempre iha implikasaun ita hamlaha nafatin, ha’u bele dehan katak ba interese Estadu ha’u laiha problema, mas tanba de’it ida rua nia kompeténsia inkapasidade mak hasai osan ne’e, Primeiru Ministru (PM), nu’udár komandante ministru nian ne’e, nia mós tenke haree di-di’ak, tanba mai ha’u nu’udár komandante ha’u sempre akompaña ha’u-nia militár sira-nia servisu no kapasidade bele ka lae. Ita deve mós di’ak, Timor-oan hotu mak hamlaha, entaun nia forsa armada mós hamlaha hotu, agora dau-daun deve hela, foos mós deve, mina mós deve, tabaku mós deve, deve ne’e la’ós ha’u Lere mak deve, maibé F-FDTL mak deve, hodi sustenta militár sira”, Lere Anan Timur ba jornalista sira, Kuarta (10/02/2021), iha Palásiu Prezidensiál Nicolau Lobato, Bairro Pite, Díli.

Lere akresenta, osan ne’e Ministériu Defeza hasai ka la hasai ne’e kompeténsia Ministériu nian, tanba sira mak kaer osan, instituisaun defeza la kaer osan. Maibé ba lideransa F-FDTL nian mak forsa sira tenke han, iha roupa, transporte, operasionál, no administrativa, forsa tenke iha kilat, forsa tenke iha infraestrutura.

“Ha’u bele dehan katak, kuaze besik fulan tolu forsa laiha osan ransu (hahán nian) agora Timor ne’e moris de’it ho osan, hanesan ema matenek balun dehan, hanorin ema kail ikan, do que loron-loron fó de’it ikan ida ne’e mak problema, la presiza relatóriu, tanba osan ba hahán ne’e regular iha ne’ebé Ministru Defeza mós hatene, ita tenke han tanba afeta liu ba forsa sira ne’ebé hala’o seguransa iha fronteira ne’eba, sira moris ho sira-nia osan ransu”, realsa Xefe Estadu Maiór F-FDTL ne’e.

Nia salienta, dau-daun ne’e sira dezenaraska hanesan iha uluk tempu guerilla nian, kabun mamuk tenke buka para han, ne’e mak agora sira halo.

Líder máximu instituisaun F-FDTL ne’e mós subliña, saida de’it depende ba orsamentu, orsamentu 2021, seidauk sai sei uza osan tezouru 2020 ninian, maibé importante mak forsa armada sira labele hamlaha.

“Ita-nia ema sira ne’ebé atu ba apoiu tan iha fronteira, presiza kondisoens, tanba ita-nia ema iha ne’eba tenke iha uma, labele ba tau iha ai-hun ho fatuk koak ida iha ne’eba, maibé laiha atensaun, tanba militár hirak ne’e iha família, iha fén, oan, agora tau iha ne’ebá ba interese ema barak ninian, nia sakrifika nia-an mós labele, tanba ne’e tenke haree mos sira-nia situasaun”, tenik Lere. oly