PNTL idenfika tan ema na’in tolu tama ilegál mai Díli

Polísia Nasionál Timor-Leste (PNTL), identifika tan ona ema na’in tolu mak tama ho ilegalmente mai iha Díli. Ema na’in tolu ne’e  PNTL identifika iha Kinta (25/02/2021) kalan.

Hafoin identifika ema sira ne’e, Polísia informa ba iha Sentru Integradu Jestaun Krize COVID-19, foti mane na’in tolu ne’e lori ba  hatama iha kuarentena ne’ebé mak Governu aluga iha otél Novo Horizonte.

 “Ita  mós  envolve  iha Sentru Integradu Jestaun Krize,  ita servisu hamutuk  ho sira,  ita identifika depois ita informa ba iha Sentru Jestaun Krize  no parte saúde nian para foti. Ohin  ita  iha  informasaun katak,  ida mós tama  ilegál,  ita iha informasaun iha na’in tolu  tama illegál, ita-nia ekipa ba foti kedas ona, maibé ita halo identifikasaun  sera que ema sira ne’e tama ilegál husi fronteira mai ka  sira ba iha munisípiu rua, hanesan Bobonaro no Suai no Oecussi. Tanba  munisípiu rua taka, sé ema sira tama ita hakarak hatene liu husi ne’ebé para nune’e  ita bele hatene”,Komandante PNTL munisípiu Díli Superintendente Xefe Henrique da Costa, ba  jornalista sira Sesta (26/02/2021), iha Kuartel Polísia Caicoli, Díli.

Henrique   mós  husu, ba membru Polísia ne’ebé koloka  iha Suku hamutuk  36 iha munisípiu Díli, atu  hala’o movimentu maka’as ba Aldeia sira,  hodi halo identifikasaun, karik iha ema ruma mak tama ilegál informa lalais ba Sentru Integradu Jestaun Krize, hodi foti ema sira ba hatama iha kuarentena.avi