JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR husu F-FDTL serví nasaun ho profisionalizmu

PR husu F-FDTL serví nasaun ho profisionalizmu

Prezidente Repúblika (PR), Francisco Guterres Lú Olo, husu ba líder no ofisiál FALINTIL-Forsa Defeza Timor-Leste (F-FDTL) hotu atu nafatin serví nasaun ho profisionalizmu no dedikasaun tomak hodi tane aas F-FDTL, nune’e hamorin Timor-Leste nia naran iha futuru.

“Alende Forsas Armadas sira-nia rekursu umanu no materiais, sira-nia esperiénsia, prontidaun, kapasidade atu hatán kedas, sira-nia kultura organizasionál no kapasidade atu adapta-an ba situasaun ne’ebé iha, mak hanesan elementu importante tebes hosi Forsas Armadas sira-nia atuasaun ne’ebé nasaun tenke kaer metin”, Chefe Casa Civil, Francisco Maria de Vasconcelos, reprezenta PR Lú Olo diskursu iha ámbitu komemorasaun aniversáriu F-FDTL ba dala 20 iha Kuartel Jenerál Fatuhada, Díli, Tersa (02/02/2021).

Nia hatutan, F-FDTL nia empeñu ne’e konta ho apoiu hosi nasaun belun barak ne’ebé iha momentu susar ba Timor-Leste, kontribui ona atu F-FDTL bele prepara-an no partisipa iha luta hasoru COVID-19. Ne’e duni, nia hakarak hato’o nia apresiasaun no rekoñesimentu ba sira.

“Kontinua atu reforma estrutura superiór Defeza Nasionál no Forsas Armadas nian, liu-liu prepara dokumentasaun estratéjiku ne’ebé estruturante, adapta no prepara instituisaun ba dezafiu foun sira ne’ebé nasaun hasoru, ne’ebé sei ezije halo jestaun ba F-FDTL nia rekursu umanu sai efikás, efisiente no rasionál liu tán, hamosu konseitu servisu militár foun ida ne’ebé sei lori mudansa importante liu ida entermus de kuantidade no kualidade no bele fó impaktu maka’as liu ba F-FDTL nia estrutura no vida institusionál, tanba konsidera nu’udar mudansa kle’an ida ba F-FDTL nia kultura no tradisaun liga ho servisu militár”.

Tuir PR Lú Olo, profisionaliza Forsa Armada Timor-Leste ne’e desizaun polítika ida ne’ebé iha ninia vantajen no dezvantajen. Mudansa sira-ne’e iha podér polítiku nia liman, ezije maturidade no konsiénsia polítika kona-bá saida mak serve no di’ak liu tán nasaun nia interese sira. Aprovasaun ba regulamentu foun hosi Lei Servisu Militár nian tenke liu prosesu tranzisaun ida ne’ebé naruk.

“Tanba ne’e mak karik ita la investe iha infraestrutura bázika, ekipamentu no armamentu, F-FDTL nia operasionalidade no kapasidade atu hala’o sira-nia misaun sei limitadu tebes. Komandante Supremu sente orgullu tebes ho ninia Forsas Armadas. Nasaun no Povu Timor-oan hatene katak, sira bele konta nafatin ho imi. Tan ne’e mak ho votu esperansa iha futuru no ho sentidu rekoñesimentu no gratidaun ba servisu ne’ebé halo ona mak ha’u, nu’udar imi-nia Komandante Supremu, fó laran-manas ba imi atu serví nafatin ita-nia Rai-Inan ho profisionalizmu no dedikasaun, hanesan uluk. Ha’u fiar katak imi sei kontribui ba tane aas FALINTIL-FDTL no Timor-Leste nia naran-kmanek”.

Lere: Jerasaun foun F-FDTL tenke unidade

Xefe Estadu Maiór F-FDTL, Majór Jenerál Lere Anan Timur, husu ba jerasaun foun sira ne’ebé iha F-FDTL atu hatene hakraik-an no iha unidade, hodi bele dezenvolve forsa armada sai di’ak liu tan ba oin.

“Atu labele haluha memoria jerasaun tuir mai komemora nafatin aniversariu transformasaun FALINTIL ba Forsa Defeza Timor-Leste ba dala 20 iha tinan 2021, apezar ho difikuldade no dezafiu oi-oin, atu labele lakon iha memoria ita nian, no mós memoria ba jerasaun tuir mai, Lere hateten, agradesimentu espesiál ba sira ne’ebé hahú ezisténsia forsa armada iha tinan 2021, hanesan nia dehan, transformasaun guerilla ba fali forsa regulár, transformasaun armada libertasaun nasionál ba Forsa Defeza Timor-Leste la’ós fásil, maibé difisil”, Lere Anan Timur iha komemorasaun aniversáriu F-FDTL ba da-20 iha Kuartel Jenerál, Fatuhada-Díli.

Lere haktuir, tanba ne’e mak  nia agradese ba sira ne’ebé mak hahú primeiru rekrutamentu iha Aileu, liu-liu veteranu sira ne’ebé mai husi komandu rejiaun sira, tanba biar idade avansadu no kondisaun  la permite, maibé sira iha espíritu reponsabilidade hakarak valoriza nafatin FALINTIL, sira motiva joven sira atu bele fó susesu ba hanoin no planu ne’ebé komandu FALINTIL iha, transforma FALINTIL ba Forsa Defeza Timor-Leste, atu valoriza nafatin instituisaun informál, ne’ebé uluk funu hasoru forsa okupante durante tinan 24.

“FALINTIL Forsa Defeza Timor-Leste ohin loron buras nu’udar rekursu umanu ho apoiu no tulun husi paíz belun sira, ne’ebé ita halo kooperasaun militár ho sira, sé buat hotu la’o tuir planu ita halo balansu depois de 20 anus ezisténsia F-FDTL ninian, ka dezenvolvimentu ne’ebé agora ita haree, ka ita agora moris ba lakon responde ho tempu ne’ebé que forsa armada eziste ba depois de 20 anus”.

“Depois tinan 20 ohin loron Ministru Defeza (MD), Brigadeiru Filomeno Paixão, ne’ebé uluk hamutuk ho ita moris loron-kalan ho ita-nia problema, mais hotu-hotu desizaun polítika, tanba ita ko’alia kona-bá profesionalizmu la’ós ita prepara ema atu sai matenek, maibé profesionalizmu ne’e asosiasaun ba kondisoens hotu, kondisoens umanu to’o kondisoens materiais, kondisoens formál psikolójika atu bele forma militár ida sai profesionál loloos, sei iha dezafiu ba kapasidade dezafiu oinsa atu bele rezolve problema, atu atinji vitoria ida ne’e presiza unidade iha asaun no pensamentu, unidade iha linguajen ida ne’e faze parte kadeia do komandu bloku diresaun ida ita tenke implementa no pratika”.

“Ita tenke hamutuk, linguajen tenke ida de’it, hanoin tenke ida de’it nu’udar komandu ida, ba imi jerasaun foun lori ida ne’e atu banati tuir, nune’e iha futuru mai bele dezenvolve ita-nia forsa armada, la’ós unidade de’it mais ita tenke kuerente ka tenke iha relasaun bazeia ba realidade, ita labele husi kotuk ko’alia ida no husi oin ko’alia ida, ita tenke ko’alia ba loos, tanba situasaun ida ne’e la’ós situasaun foun, ita hahú hari’i ita-nia Estadu no nasaun kuarénsia ba relasaun dalaruma laiha, tanba mentalidade kolonializmu no mós mentalidade invazór ninian no barak mai husi frente klandestina, ko’alia husi oin buat ida no ko’alia husi kotuk buat seluk, ida ne’e mak ita tenke muda iha ita-nia era ukun-an ida ne’e, liu-liu iha instituisaun nia laran”, tenik Xefe Estadu Maiór F-FDTL ne’e.

Lere Anan Timur fundamenta, atu hetan vitoria tenke hakraik-an, labele iha arogánsia no foti-an. Tanba ne’e mak husu ba ofisiál sira, ba líder sira hotu ne’ebé hola parte iha vida nasaun nian no vida Estadu nian tenke hakraik-an, hatene rona ema, hatene aprende husi ema ida ne’e mak importante.

Entretantu tuir observasaun, Prezidente Repúblika (PR), Francisco Guterres Lú Olo, ho eis titulár sira seluk la marka prezensa iha aniversáriu F-FDTL ba dala 20 ne’e. oly

Lee hotu :   PDHJ rejista kazu violasaun direitu umanu envolve PNTL hamutuk 23

Add to Comments Here!!!!

error: Content is protected.
Secured By miniOrange
You might also like:
Sistema Asycuda World sei hadia atividade negósiu TL

Ministru Koordenadór Asuntu Ekonómiku (MKAE), Joaquim...

Korea seidauk simu traballadór Timor-Leste

Embaixadór Korea du Súl ba Timor-Leste...

Empreza R2M IT Solution keixa Vise MI ba PCIC

Empreza R2M IT Solution hato'o ona...

Close