Pasiente COVID-19 iha Tasi-Tolu hatudu hahalok má edukadu ba malu

Pasiente COVID-19 mane ida iha sala izolamentu Tasi-Tolu, tenta hatudu hahalok má edukadu hanesan hafuhu ema hariis iha hariis fatin-laran ba pasiente feto sira, iha loron 22 ne’e mais ou menus iha lorokraik tuku 15:00 OTL.

Ho akontesementu ne’e pasiente ne’e husu ba Sentru Integradu Jestaun Krize (SIJK) atu foti medidas ruma hasoru ema ne’ebe hatudu hahalok má ne’e.

“Akontesimentu ne’e horiseik lorokraik, wainhira ha’u  ho ha’u nia oan ba haris-fatin, ha’u hakrúk foti gayung, maibé ha’u-nia oan ne’e haree ema ida hafuhu, nune’e ha’u sai bá dehan seguransa la halo buat ida, tanba ne’e ha’u husu ba SIJK atu foti medidas ruma ba ema ne’e, ho akontesimentu ne’e halo ha’u nia oan tauk”,Pasiente COVID-19 Tasi-Tolu, ba JN-Diário,  via telefone, Tersa (23/03/2021).

Pasiente ne’e mós informa situasaun ne’e ba nia maluk pasiente sira seluk hodi buka tuir, no ikus mai hetan duni mane ne’ebé tenta atu hafuhu ema haris iha haris-fatin laran.

Hatán ba asuntu refere, Koordenadór Forsa Tarefa no Mitigasaun Surtu COVID-19, Rui Maria de Araújo, hatete, insidente ne’ebé akontese iha fatin izolamentu Tasi Tolu, jestór sira iha izolamentu rejista ona hodi foti medida atu labele akontese tan.

“Insidente ne’ebé akontese iha fatin izolamentu Tasi-tolu, jestor sira iha izolamentu rejista ona e foti medidas preventivas atu labele akontese tan”,esplika Rui Araújo. eni