PN konsidera Polísia hanorin ekipa saneamentu basa malu ne’e la merese

Deputada Komisaun B trata asuntu defeza, seguransa no relasaun esterna, Maria Rosa da Câmara Bisoi, konsidera, aktu polísia ne’ebé basa traballadór foti lixu ba Tibar ne’e, la merese, tanba traballadór hirak ne’e, hola risku hodi kontinua servisu, tanba atu garante no redus lixu iha sidade-laran.

Deputada CNRT Bisoi ko’alia asuntu ne’e, hafoin asesa vídeo ne’ebé víral iha média sosiál, liga ho kazu ne’ebé akontese iha Kuarta (10/3/2021) ne’e, iha parte Tasi-tolu, Díli.

“Kona-bá atuasaun Polísia ohin dader ba ekipa saneamentu ne’ebé rekolla lixu nia vídeo víral loos iha média sosial ne’e, ita haree katak laiha lójika, polísia nia atuasaun ba traballadór ki’ik sira ne’e. Sira ne’e foti fo’er ne’ebé iha Díli laran ne’e lori sai tau iha nia fatin para labele afeta komunidade nia saúde. Kuandu lixu mós labele sai, ema mós labele sai ne’e tenke deside lai buat ruma, ne’e para ema bele hatene, atuasaun ne’ebé halo ne’e, tuir loloos ne’e halo xamada de’it ba kompañia ne’ebé responsavel ne’e”,tenik deputada CNRT ne’e ba jornalista iha PN, Kuarta (10/03/2021).

Alénde ne’e, deputadu Fretilin, Joaquim dos Santos, husu Governu ho kompañia ne’ebé responsavel ba lixu, atu iha koordenasaun didi’ak, nune’e labele víola regra serka sanitária.

“Presiza iha koordenasaun antes, entre instituisaun relevante sira, relasiona ho zona ne’ebé iha serka sanitária ne’e, tanba ida ne’e objetivu ida de’it mak atu salva ema labele mate, entre institusisuan Estadu sira tenke iha koordenasaun ba malu, labele lakon koordernasaun, ita hala’o ita-nia knár depois ema seluk sai vítima fali, ida ne’e mak hanoin instituisaun estadu nian ka kompañia presiza koordenasaun”,tenik deputadu Fretilin ne’e.

Kazu ne’e akontese iha Tasi-Tolu atu ba Tibar, bainhira ekipa saneamentu rekolla lixu atu ba so’e iha Tibar, deskonfia ekipa hirak ne’e balun tur iha kapaun leten.

Maske nune’e, to’o nótisia ne’e fó sai,  GMN seidauk halo konfirmasaun ho parte polísia, inklui parte ne’ebé responsavel ba kompañia ne’ebé foti lixu, tanba serka sanitária.

Submete ona ba prosesu identifikasaun

Membru Polísia  husi Batallaun Orden Públika (BOP) ho inisiál PEX ne’ebé mak fó basa ba ema na’in rua iha Tasitolu submete ona ba prosesu identifikasaun.

Kazu ne’e akontese Tersa (09/03/2021) mais ou menus iha tuku  tolu lorokraik, oras Timor-Leste, ikus mai sai virál iha públiku.

Komandante Unidade Espesiál Polísia Superintendente Xefe Orlando Gomes hateten,   Polísia Batallaun Ordem Públika hala’o seguransa iha Tasitolu, hodi apoiu Komando PNTL munisípiu Díli  hodi taka dalan,  relasiona ho serka sanitária. Maibé  durante taka dalan, membru BOP  ida  fó ezemplu hodi basa ema na’in ida núdar traballadór saneamentu.

“Depois ita hetan informasaun  ita halo prosesu identifikasaun kedas  ba iha terrenu, identifika duni  ita nia membru  ida ne’ebé mak halo asaun   ba ita nia sidadaun na’in rua, núdar saneamentu  ho kareta lori lixu ba fakar iha Tibar,  maibé  iha momentu ne’ebá ita nia membru sama atensaun ba sidadaun na’in rua ne’e, tanba tuur iha kapon leten, primeiru sama aténsaun, depois sira ba, fila mai, ba segundu sira tuur nafatin iha kapon leten  to’o dala tolu. Tanba  ne’e mak  ita nia membru ne’e haruka  ema na’in rua ne’e haruka tuun husi kareta leten, hodi haruka basa malu, depois membru ne’e fó izemplu hodi basa ita nia sidadaun ne’e”,esplika Komandante Unidade Espesiál Polísia Superintendente Xefe Orlando Gomes,  ba  GMN Kuarta (10/03/2021), iha Kuartel Polísia Espesiál Bairu-Pite Díli.

Relasiona ho kazu ne’e, ema na’in rua ne’ebé mak han pankada  seidauk hato’o keixa ruma ba iha parte Komando PNTL, hodi loke prosesu investigasaun.say/avi