PNTL detein grupu balun iha Beto-Tasi ne’ebé baku joven na’in rua

Joven na’in rua ho inisiál AB no AC ne’ebé hetan torturasaun, husi grupu joven  balun iha Beto-Tasi, hetan ona kapturasaun no detein ona husi Polísia Nasional Timor-Leste (PNTL).

Kazu torturasaun ne’e akontese Domingu (21/03/2021) mais ou menus tuku tolu lorokraik, iha  Aldeia Beto-Tasi, Suku Madohi, Postu Administrátivu Dom Aleixo hafoin fó sai virál iha Media Sosiál.  Nune’e iha Segunda (22/03/2021) PNTL kaptura kedas suspeitu na’in rua iha Beto-Tasi hodi ba tuir prosesu investigasaun.

Segundu Komandante PNTL munisípiu Díli, Superintendente Euclides Belo,  hateten, mane na’in rua ho inisiál AB no AC, ne’ebé mak hetan agrésaun fízika, antes deskonfia estraga  uluk ema nia sasán iha  Kampung-Alor, maibé ikus mai,   mane  na’in rua ho inisiál  AB ne’ebé mak tatto anti PNTL, F-FDTL no BOP no AC sai fali vítima,tanba hetan agresaun fízika husi joven balun.

 “Tuir informasaun ne’ebé mak ami hetan katak, sira na’in rua antes ne’e ami hetan mós katak, sira na’in rua hetan mós krime,  asaltu ne’ebé mak sira komete, ne’ebé rezultadu investigasaun mak sei la’o hela, depois sira na’in rua sai fali vítima  husi asaun grupu ida ne’ebé mak  halo asaun ba sira”,esplika Segundu Komandante PNTL Munisípiu Díli Superintendente Euclides Belo, ba GMN iha Kuartel Polísia Kaikoli, Díli.

 Euclides Belo akresenta, tuir grupu  joven sira iha Beto-Tasi kaptura mane na’in rua ne’e  tiha aguarda de’it komunika ba Polísia ba foti hodi submete sira  na’in rua  ba iha prosesu investigasaun, atu nune’e sira  na’in rua bele  responde ba aktu  ne’ebé mak sira komete.

 Maibé  mosu tan krime seluk torturasaun, agrésaun fízika, ne’ebé sira na’in rua sai fali vítima ba asaun krime.

 Atuasaun Polísia la haree ba A ka B, Polísia haree ba saída mak akontese, konsidera hanesan  krime  Polísia foti medida.

“Bazeia ba video  ne’ebé mak iha  ami buka tuir ona sira ne’ebé mak halo asaun fízika  hasoru sira na’in rua, tanba iha kódigu penál  ho meus saída de’it fízikamente halo terus ema  hakanek ema ne’e krime. Ida  mós iha transporte halo virál iha média, transporta alin na’in rua ne’e ba iha Unidade Espesiál Bairu-Pite, iha kareta laran mós sira hasai video, agora entrega a’an ona ba iha Eskuadra  Dom Aleixo”,dehan Euclides Belo.

Mane na’in rua ho inisiál AB no AC, hala’o ona tratamentu iha Hospital Nacional Guido Valadares, no dadauk ne’e, iha Kuartel Polísia Kaikoli.

Maske kazu ne’e akontese ona, Polísia seidauk fó sai kona-bá kronolojia lolos, tanba  prosesu investigasaun sei la’o hela.avi