VMI husu komunidade kumpri regra SS-KO

Vise Ministru Interiór (VMI), Antonio Armindo, husu ba komunidade hotu atu kumpri regra serka sanitária (SS) no konfinamentu obrigatóriu (KO).

Vise Ministru Interiór, António Armindo hato’o lia hirak ne’e ba  GMN, Domingu (16/5/2021), relasiona ho Governu aplika regra serka sanitária  no konfinamentu obrigatóriu, maibé komunidade balun la iha nesesidade importante, maibé kontinua hala’o movimentu.

Tanba ne’e, nia husu ba Polísia Nasionál Timor-Leste, atu hala’o pasa revista hodi aperta komunidade, atu hele iha uma, bainhira laiha nesesidade ruma.

 “Ita iha dekretu fó lisensa ba  ema sira ne’ebé mak presiza  atu ba sosa aimoruk no ba sosa sasán nesesidade bázika hanesan modo no hahán  sira ita autóriza. Ida ne’e mak movimentu la’o hela ne’e. Mas  ita fó nafatin oriéntasaun ba PNTL  atu kontinua implementa regra ne’e, ita hatene balun rejiste nafatin lakohi atu koopera, mas papél PNTL nian impoin nafatin regra sira ne’e”,esplika Vise Ministru Interiór, António Armindo, iha ró Lucitania.

Konsellu Ministru aprova ona projetu rezolusaun Governu nian, ne’ebé mantein impozisaun serka sanitária iha Munisípiu sira Baucau, Covalima no Díli ba loron 14 tan, no mantein impozisaun konfinamentu obrigatóriu iha Munisípiu Díli ba loron 14 tan.

 Konsellu Ministru deside ona la renova impozisaun serka sanitária, ne’ebé sei vigora to’o loron 16 fulan-maiu, iha munisípiu sira Ainaro, Ermera, Lautem, Liquiça, Manufahi no Viqueque.
Nune’e, kontinua bandu sirkulasaun ema sira nian entre munisípiu sira Baucau, Covalima no Díli no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun husi sistema sira abastesimentu públiku, ka razaun seluk ne’ebé presiza atu hala’o ba interese públiku nian

To’o oras ne’e Timor-Leste, rejista ona ona óbitu COVID-19 hamutuk na’in 10.

Husi númeru ne’e, na’in sia Timor-oan, na’in ida sidadaun Xineza.avi

Leave a Reply

Your email address will not be published. Required fields are marked *