GMN TV Politika Alkatiri la gosta Governu unidade nasional "Veteranus sei blokeia CNRT, PLP no KHUNTO

Alkatiri la gosta Governu unidade nasional "Veteranus sei blokeia CNRT, PLP no KHUNTO

0 views

Sekretáriu Jeral partidu FRETILIN, aktual Primeiru Ministru (PM), Mari Alkatiri, lakohi atu rona ho liafuan Governu unidade nasional, tanba lideransa sira laiha unidade nasional.

Alkatiri afirma, ezijensia veteranu sira nian kona ba Governu unidade nasional ne’e, direitu sira nian, tanba sira preokupa ho situasaun polítika governativa, maibé Prezidenti Repúblika sei tetu polítika ida ne’e.

“Veteranu sira uluk luta atu resolve problema, sira la’os luta atu halo problemas. Ha’u la gosta Governu unidade nasional ne’e, tanba atu lori se  tan mak atu tama iha ne’eba, hakarak ita resolve problema ita resolve, hakarak ita buka solusaun ita buka, maibé labele halo konfuzasaun,”katak Mari Alkatiri ba jornalista sira iha CCF Comoro Dili, Sabadu (06/01), hafoin hasoru malu ho veteranu sira husi Munisipiu 12, inklui Rejiaun Administrativa Espesial Oe-cusse Ambeno.

Maibé Xefi Governu ne’e afirma, ida ne’e konseitu ida ne’ebé la’o dadaun, ne’ebé tenki buka atu esplika ba públiku kona ba konseitu unidade nasional ne’e, tanba VII Governu ne’e partidu hotu involve ona iha laran, inklui ema independenti.

 “Uluk kedas Governu ne’e atu halo Governu koligasaun, inkluzaun no insidensia Parlamentar, ita dehan Governu unidade nasional ne’e signifika saida. Governu ida agora ne’e unidade ona, tanba ema PLP mós iha ne’eba, CNRT mós iha ne’eba, independenti mós iha ne’eba,”  katak Alkatiri.

Nia hatutan, veteranu husi Munisipiu hotu apoiu Governu ida ne’e, tanba sira haree programa VII Governu ne’e nian diak.

“Tanba iha opozisaun ida ne’ebé rejeita buat hotu, entaun ita resolve mak ida ne’e, tanba iha opozisaun ida ne’ebé Governu forma ona mak sira halai hamutuk hodi haluha tiha sira-nia promesa ba povu oin ida, agora sira halo oin seluk. Agora ita dehan katak atu muda VII Governu, sei muda VII Governu, la’os unidade nasional ona,”katak Alkatiri.

Tuir informasaun ne’ebé mak Alkatiri hetan katak, opozisaun hakarak halakon VII Governu no hamosu VIII Governu.

“Maibé ita halibur malu atu sai barak no bo’ot liu ida agora ne’e, ha’u hanoin ne’e lahetan karik. Agora laiha komunikasaun tanba Xanana sei iha rai liur,”katak Alkatiri.

Alende ne’e, Alkatiri dehan, partidu CNRT, PLP  no KHUNTO ne’ebé mak dada bandeira Aliansa Maioria Parlamentar ne’e, hanesan meius ida atu buka fali sira nia identidade foun.

Ezistensia opozisaun iha Estadu ida ne’e preve iha konstituisaun RDTL. No bankada opozisaun sira ne’ebé forma ona Bloku Opozisaun Aliansa Maiaoria Parlamentar husi Partidu tolu ho kadeira 35 iha Parlamentu Nasional deklara ona ba publiku katak, sira halo politika tuir konstituisaun RDTL haruka, no konstituisaun mak gia Estadu ida ne’e.

Veteranus sei blokeia CNRT, PLP no KHUNTO

Alende ne’e, Veteranu sira ne’ebé apoiu partidu CNRT, PLP NO KHUNTO konsidera bankada opozisaun Aliansa Maioria Parlamentar (AMP) lakohi atu hasai povu husi kiak no mukit no dezenvolvimentu  atu la’o iha rai ida ne’e,  tanba sira rezeita programa VII Governu ne’ebé diak ba povu no nasaun ida nee.

Tanba ne’e, veteranus husi Munisipiu Munisipiu 12 inklui Rejiaun Administrativa Espesial Oe-cusse Ambeno, halo deklarasaun konjuntu iha Comite Central da FRETILIN (CCF) Comoro Dili hodi  promete katak, sira sei blokeia partidu CNRT, PLP no KHUNTO, kuandu eleisaun antesipada mosu.

 “Ba eleisaun antesipada mak, ami veteranus ne’ebé fó apoiu ba CNRT, PLP no KHUNTO nomós partidu sira seluk, ami pronto atu organiza malu hodi fila fali ba hamutuk ho FRETILIN no vota ba FRETILIN hodi manan maioria absoluta iha eleisaun antesipada, nune’e bele implementa VII Governu nia programa iha tinan 2018,”katak reprezentante veteranu sira,  Guido Guterres Abel alias ‘FITUN’ liu husi konferensia ba imprensa, Sabadu (06/01), hafoin enkontru ho lideransa sira husi CCF.

VII Governu nia programa ne’ebé diak ba povu no nasaun ida ne’e, maibé AMP rejeita. Ida ne’e hatudu katak, sira lakohi atu hasai povu husi kiak no mukit, no lakohi atu dezenvolve nasaun ne’e ba diak.

“Ami veteranus tinan 1975 ne’ebé fó apoiu ba partidu sira hanesan CNRT, PLP no KHUNTO, nomós partidu seluk tan hato’o preokupasaun kona ba situasaun polítika iha rai laran,” katak veteranus Guido Guterres Abel.

Nia hatutan, partidu hotu iha kampaña hato’o sira-nia kompromisu katak,kombate korupsaun, komabte pensaun vitalisia, no hametin unidade nasional, hametin estabilidade, paz no harmonia, maibé partidu sira ne’e la kumpri nia liafuan hirak ne’ebé ko’alia iha kampaña.

“Ami veteranus tinan 1975 husu ba Prezidenti Repúblika ho nia kompetensia hodi bolu AMP forma Governu unidade nasional,” katak Guido Guterres Abel.

Maibé veteranu sira ne’e propoin katak, bainhira AMP simu atu forma Governu unidade nasional, Mari Alkatiri mak kontinua kaer pasta hanesan Primeiru Ministru ba VIII Governu, no bele halo remodelasaun ba Ministru no Sekretáriu Estadu sira hotu.

Veteranu sira ne’e mós husu ba F-FDTL no PNTL atu hametin nafatin neutralidade hodi fó seguransa nasional. Sira mós husu ba juventude no povu tomak atu kontribui ba paz no estabilidade hodi halo dezenvolvimentu atu hasai povu husi kiak no mukit.cos


Banner

Foto

Notisia Ikus

PN kestiona PolTranz “falla”, Komandante PolTranz husu Deskulpa

October 15, 2021
Parlamentu Nasional (PN) liu husi Deputadu Komis...

Posibilidade CNRT sei la akompaña Governu hala'o kampaña vasinasaun

October 15, 2021
Deputadu sira iha Parlamentu Nasionál (PN) ohin...

Ohin, Governu aprezenta OJE 2022 ba PN

October 15, 2021
Governu aprezenta Orsamentu Jerál Estadu (OJE) ...

Governu kontinua “alerta” FP la vasina, sei la tama servisu

October 14, 2021
Ministru Prezidensia Konsellu Ministru, Fidelis ...

SEAKLN “defende” veteranu la impede dezenvolvimentu

October 14, 2021
Sekretáriu Estadu Asuntu Kombatentes Libertasau...
1 2 3 652

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker