GMN TV Politika BOAMP prepara ona estrutura VIII Governu ■Laiha lei ba eleisaun antesipada

BOAMP prepara ona estrutura VIII Governu ■Laiha lei ba eleisaun antesipada

0 views

Hein desizaun husi Prezidenti Repúblika (PR), Francisco Guterres ‘Lu-Olo’, kona ba impase polítika iha rai laran, dadaun ne’e Bloku Opozisaun Aliansa Maioria Parlamentar (BOAMP) prepara ona estrutura VIII Governu, Orsamentu Jeral Estadu 2018 no Organika Governu.

Xefi bankada CNRT, Arão Noe, hateten, situasaun ne’ebé mak agora dadaun Timor Leste atravesa ne’e, fulan lima resin ona, no povu moris iha situasaun inserteza nia laran.

“Agora dadauk estrutura VIII Governu  tiha ona, se mak atu lidera Governu, se mak Prezidenti Parlamentu Nasional, inklui programa Governu, lei organika Governu, no Orsamentu Jeral Estadu. Ami hein de’it orden husi Prezidenti Repúblika nian, tanba ami buat hotu preparadu ona. Tanba ne’e mak ami hatete katak, sei fó fiar ba AMP atu forma VIII Governu, iha fulan ida nia laran de’it, ami sei bele rezolve situasaun sira ne’e hotu, tanba maioria Parlamentar ne’ebé sufisiente atu aprova programa sira ne’ebé Governu lori mai,” relata Arão Noe ba jornalista sira liu husi konferensia ba imprensa iha Parlamentu Nasional (PN), Tersa (09/01).

Nia haktuir,  fulan 5 resin ona, situasaun ne’ebé agora dadaun nasaun TL  ultrapasa mak  situasaun ida inserteza, tanba Governu nia programa seidauk aprova, formasaun Governu tomada de posse dala tolu, lei organika lori fulan ida resin mak aprova, lei orsamentu jeral Estadu seidauk iha, entaun lori inserteza ba nasaun ida ne’e.

Tanba ne’e, Arão Noe dehan, desde AMP hamrik, fó ona kumpromisu ida katak, atu buka solusaun hodi ultrapasa situasaun ida ne’e.

Nia haktuir, to’o agora Governu dada atu tempu atu aprezenta programa Governu nian ba daruak iha Parlamentu Nasional, tanba Governu tauk atu monu lalais.

“Segundu programa la mai, no Orsamentu Jeral Estadu la mai, tanba de’it Governu tauk, kuandu mai segundu programa mak la passa, entaun Governu monu, no Orsamentu Jeral Estadu mai mak la aprova mós Governu monu. Tanba ida ne’e mak Governu buka ses husi regras normal sira hodi dada situasaun ida ne’e,” katak Arão.

Alende ne’e, Xefi bankada PLP, Fidelis Magalhães mós informa katak, lider sira hanesan Kay Rala Xanana Gusmão, Taur Matan Ruak no Naimori sei la husik nasaun no povu Timor Leste atu monu.

“Kona ba estrutura Governu detallas ne’e, depois mak ami sei informa ba ita bo’ot (jornalista) sira,” tenik Fidelis.

BOAMP mós  konsidera Prezidenti Parlamentu Nasional, Aniceto Guterres nia aktu sira durante ne’e, viola rejimentu Parlamentu Nasional.

Reprezentante BOAMP, Fidelis Magalhães, hateten, PPN nia kompetensia tuir artigu 17 rejimentu PN, mak hanesan, prezide meja PN, marka sensaun plenária, no fiksa ordem do dia tuir hakerek iha rejimentu PN, hafoin rona tiha konferensia ne’ebé reprezentante bankada parlamentar, organiza sesaun plenária, admite ka rejeita projetu no proposta de lei ka rezolusaun, projetu deliberasaun no rekerementu hafoin verifika tiha nia regularidade rejimetal, la taka dalan ba direitu rekursu ba plenária, mantein ordem disiplina no seguransa PN nian, promove publikasaun ba debate, servisu no aktu hotu PN nian, konvoka no prezide konferensia reprezentante bankada parlamentar nian.

Fidelis hatutan, ho baze ba pontus hirak ne’e, aktu PPN nian iha Segunda no Tersa semana ne’e, iha primeira sesaun plenária tinan 2018 hatudu katak, PPN nia intensaun la marka prezensa no lakohi prezide plenária ordinária ida ne’e nu’udar violasaun ba artigu 46 númeru 1 rejimentu PN, ne’ebé hateten, atividade ka reuniaun plenária iha loron Segunda no Tersa, no artigu 17 rejimentu PN.

Fidelis afirma, deputadu sira husi BOAMP lamenta tebes ho attitude husi PPN ne’e, tanba konstitui violasaun grave ba rejimentu PN.

Tuir BOAMP katak, karik PPN laiha ona vontade atu prezide plenária tuir rejimentu PN haruka, maka tuir lolos PPN bele delega ba Vise Prezidenti sira bazeia ba artigu 22 rejimentu PN hodi hala’o funsionamentu normal Parlamentu Nasional nian.

“Karik PPN laiha ona vontade atu jere meja PN, ami sujere ba PPN tama on aba ajenda destituisaun hodi entrega hikas ba ema seluk, duke abandona deliberadamente fali plenária no blokeia funsionamentu normal PN nian. Aktu ida ne’e la valorize previlezu sira ne’ebé mak Estadu atribui ba Prezidenti Parlamentu Nasional, nu’udar Segundu orgaun soberania Estadu nian,” tenik Fidelis.

Iha sorin seluk, Xefi bankada FRETILIN, Francisco Branco hateten, hanoin sira ne’ebé BOAMP halo durante ne’e, sistemátiku tebes hodi hadau lalais poder husi FRETILIN no PD.

Nia haktuir, iha tinan 10 nia laran ne’e, Estadu Timor Leste gasta osan US$ 12 biloens. Husi US$ 12 Biloens ne’e, US$ 7 biloens ba bens konsuniveis, no US$ 5 biloens ba infra-estruturas.

Branco afirma, ho balansu osan ida ne’e mak  to’o konkluzasaun ida katak, povu mak halo determinasaun justisa ba polítiku sira liu husi eleisaun 22 Jullu 2017. Tanba ida ne’e mak povu fó sansaun ba CNRT lakon kedas kadeira 8, maske iha tinan 10 gasta US$ 12 bioloens iha Governasaun,” katak Branco.

“Ami hanoin katak, opozisaun mak halo blokeia ba funsionamentu normal PN nian, tanba bainhira iha ajenda ruma ne’ebé sira hatama, mak sira foin partisipa iha atividades Parlamentu nian, maibé bainhira atividades ba interese sira nian, sira blokeia totalmente funsionamentu iha komisaun sira,” katak Branco.

Alende ne’e, deputadu Antoninho Bianco husi bankada FRETILIN mós hateten, BOAMP iha ona mehi bo’ot ida katak, Prezidenti Repúblika atu fó fali ukun ne’e ba sira.

“Ida ne’e aktu ida ne’ebé sira halo atu hadau poder, tanba iha inisiu formasaun Governu, sira hamosu ona ho termu oi-oin, to’o programa Governu nian mós sira vota kontra Orsamentu Retifikativu, hatama mosaun sensura ba Governu, no karta destituisaun ba PPN,” relata Antoninho.

Nia haktuir, polítika ne’ebé mak BOAMP halo durante ne’e, sistematiku tebes, ho objetivu ida de’it, atu hadau ukun ne’e lalais husi FRETILIN no PD.

“Ohin mak sira foin deklara katak, sira prepara ona estrutura VIII Governu, no buat hot-hotu sira prepara ona, no sira lakohi atu eleisaun antesipada akontese,” katak Antoninho Bianco.

Maibé Antoninho Bianco husu ba BOAMP atu lalika mehi hodi hadau ukun ne’e lalais, tanba iha Estadu direitu demokrátiku, atu kaer ukun, tenki husu poder ba povu liu husi eleisaun.

Laiha lei ba eleisaun antesipada

Bloku Opozisaun Aliansa Maioria Parlamentar (BOAMP) mos lakohi atu eleisaun antesipada mosu, tanba Timor Leste seidauk iha lei ida hodi regula kona ba eleisaun antesipada ne’e.

Xefi bankada PLP, Fidelis Magalhães, hateten,  Timor-Leste laiha esperiensia eleisaun antesipada desde Estadu RDTL ejiste, maske hasoru krize polítiku iha 2006.

“Eleisaun antesipada la’os desizaun ne’ebé diak ba dezenvolvimentu nasional ho razaun, eleisaun antesipada sei perturba povu nia atividade normal ba moris diak, seidauk iha lei ida mak regula kona ba eleisaun antesipada, laiha razaun konstitusional atu dissolve PN hodi hakat ba eleisaun antesipada, laiha orsamentu propriu ba eleisaun antesipada,  laiha Orsamentu Jeral Estadu 2018 hodi sustenta povu nia moris, liu husi salariu ba funsionáriu públiku, PNTL, F-FDTL, veteranus, idozus selu projetu sira no seluk tan,” katak Fidelis Magalhães ba jornalista sira liu husi konferensia ba imprensa iha PN, Tersa (09/01).

BOAMP mós konsidera eleisaun antesipada hamosu presedente ne’ebé ladiak ba vida polítika iha futuru.“Karik rezultadu eleisaun antesipada sei lori ita ba situasaun impase polítiku hanesan agora, sera ke ita tenki hala’o bebeik eleisaun antesipada?,” katak Fidelis.

Tanba ne’e, Fidelis, afirma, atu garante no hases husi risku no implikasaun hirak ne’e ba povu no Estadu, maka AMP reitera nia prontidaun hodi asume responsabilidade Governativa ho lideransa Kay Rala Xanana Gusmão, ho Taur Matan Ruak, bainhira Prezidenti Repúblika fó fiar atu kaer VIII Governu konstitusional.

Maibé Fidelis dehan, maske nune’e, karik Prezidenti Repúblika deside tuir vontade Sekretáriu Jeral partidu FRETILIN, Mari Alkatiri ne’ebé ko’alia bebeik iha media sosial kona ba eleisaun antesipada, maka BOAMP prontu atu partisipa no garante sei hodi vitoria ba povu tomak, hamutuk ho lideransa Kay Rala Xanana Gusmão, Taur Matan Ruak, José dos Santos Naimori Bucar no entidade polítika seluk ne’ebé hanoin hanesan ho BOAMP hodi defende konstituisaun RDTL.

Maibé  Xefi bankada FRETILIN, Francisco Branco hateten, interpretasaun konstituisaun hanesan BOAMP hateten ne’e lalos.

“Lei ba eleisaun jeral Parlamentar ne’e mak sei serve, karik Prezidenti Repúblika hasai desizaun final atu disolve PN ho halo eleisaun antesipada, lei eleisaun jeral ne’e mak uza nafatin. La presiza lei espesial ida atu regula eleisaun antesipada,”katak Branco.

Alende ne’e, Branco mós kestiona katak, BOAMP hateten, eleisaun antesipada ne’e, presedente ida ladiak ba vida polítika futuru TL nian.

“Ami hanoin ida ne’e lalos, tanba eleisaun antesipada ne’e mós pozitivu, hodi fó fila fali poder ne’e ba povu, hodi povu deside fila fali liu husi prosediamentu demokrátiku iha urnas, atu determina se mak serve liu atu kaer ukun nasaun ne’e ba oin,”afirma Branco.cos


Banner

Foto

Notisia Ikus

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...

Governu kontinua propoin PR renova EE da-19

October 21, 2021
Konsellu Ministru (KM) iha reuniaun Kuarta (20/1...

Movimentu livre iha finadu, Governu apela sidadaun “tenke” vasina

October 21, 2021
Ministru Prezidénsia Konsellu Ministru (MPKM), ...

MOP la realiza ninia promesa

October 20, 2021
Ministériu Obras Publikas (MOP), Diresaun Nasio...
1 2 3 653

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker