GMN TV Politika Enkontru PR ho PARPOL, PLP kumpri desizaun PR, FRETILIN prefere eleisaun antisipada

Enkontru PR ho PARPOL, PLP kumpri desizaun PR, FRETILIN prefere eleisaun antisipada

0 views

Prezidenti Repúblika Francisco Guterres Lú Olo, Tersa feira (23/1) konvoka reuniaun ho partidu polítiku sira ne’ebé hetan asentu iha Parlamentu Nasionál (PN). Enkontru ne’e Xefi Estadu organiza atu rona opiniaun husi partidu polítiku sira molok ema númeru um ne’e foti desizaun hodi hakotu impase polítika ne’ebé nasaun ne’e infrenta.

Enkontru ne’ebé hahú ho partidu FRETILIN iha tuku 09:00 OTL, marka prezensa husi lideransa másimu partidu FRETILIN Sekretariu Jerál Marí Alkatiri ho membrus Comite Central FRETILIN (CCF) nian balun inklui deputadu sira husi bankada FRETILIN nian iha Parlamentu. Iha tuku 10:00 ho CNRT, PLP tuku 11:00, PD 15:00 no Partidu KHUNTO iha 16:00.

Entretantu husi PLP lidera husi Prezidenti Partidu rasik, Taur Matan Ruak no akompaiña mós husi membru estrutura partidu no mós deputadu sira PLP nian iha parlamentu.

Hafoin enkontru ho Xefi Estadu durante oras ida, Prezidenti PLP, Taur Matan Ruak hateten, atu solusiona impase polítika ne’e, di’ak liu Prezidenti Repúblika tenke foti duni desizaun ruma, maibé ba PLP sei kumpri no hakruk ba desizaun saida deit mak PR foti.

“Ami nia pozisaun ne’ebé ami transmite ba Prezidenti Repúblika katak, iha situasaun hanesan ne’e di’ak liu iha desizaun du ke la halo desizaun, nia bele aat mós tenki hasai. No ami fó apoiu tomak desizaun saida de’it mak Prezidenti Repúblika toma, ami nia partidu simu i hanesan mós porta voz Aliansa Maioria Parlamentar (AMP), garante ba Prezidenti Repúblika katak, desizaun saida de’it mak nia toma ami kumpri no kontribui,” Taur Matan Ruak haktuir ba jornalista sira, iha Palásiu Prezidensiál Nicolau Lobato Bairu Pite.

Maibé Taur Matan Ruak esplika, wainhira Prezidenti Repúblika desidi katak eleisaun antesipada nu’udar dalan ba hakotu krize polítika agora ne’e dadaun, PLP prontu kumpri no avansa nafatin. Maibé iha situasaun agora ne’e, di’ak liu PR mak tenki foti desizaun.

Kestiona konaba partidu CNRT sujere ba Prezidenti Repúblika atu fó ba AMP hodi kaer Governu, Porta voz AMP ne’e mós haklaken katak, lakohi mete partidu seluk nia opiniaun.

“Ha’u koalia konaba ha’u nia Partidu nian deit, lakohi koalia ema seluk nian”, Taur Matan Ruak fundamenta.

Entretantu enkontru Sekretáriu Jeral Partidu FRETILIN Mari Alkatiri ho estrutrura Partidu FRETILIN ho PR Francisco Guterres Lú Olo ne’e, Partidu FRETILIN la aseita ho governu undade nasionál maibé prefere liu eleisaun antesipada, nu’udar dalan úniku atu solusiona krize polítika ne’ebé nasaun infrenta.

“Ha’u hanoin katak semak soberanu atu foti desizaun ikus liu, ha’u la koalia ba Prezidenti Repúblika, desizaun atu ba ukun nian semak atu ukun, ne’e povu mak soberanu, Prezidenti Repúblika tuir konstituisaun bele loke dalan ou bele la loke, maibé ba FRETILIN tenki fó fila ba povu atu desidi, ne’e mak dalan ba eleisaun antesipada,”hateten Alkatiri ba jornalista sira hafoin enkontru ho PR.

Alkatiri mós garante katak, sé ba eleisaun antesipada FRETILIN la presiza ba halo tan kampaiña, tanba manan tiha ona. Maibé sei respeita desizaun saida de’it husi PR.

“Ami ba eleisaun para atu manan hodi ukun, la’os ba eleisaun para atu lakon, la’o hamutuk ho PD ne’e sei la’o ba tempu naruk”, Marí Alkatiri esplika.

Enkontru hanesan mós hala’o ho Partidu Polítiku hanesan Partidu Demokrátiku (PD) ne’ebé mak oras ne’e hamutuk iha Bloku Koligasaun FRETILIN nian hodi kaer ukun VII Governu.

Hafoin ne’e, PR mós sei halo enkontru ho partidu KHUNTO ne’ebé ho kadeira lima iha Parlamentu Nasionál (PN) no okupa mós kadeira Vise Prezidenti Parlamentu Nasionál iha terseira lejislatura.

Tuir ajenda PR nian, hafoin rona tiha partidu polítiku sira ne’e, iha Kuarta-feira, (24/01) tuku 09:00 OTL, Prezidente Repúblika mós sei konvoka reuniaun membru Konsellu Estadu, ne’ebé ba periodu 2017-2022.

Antes ne’e mós Prezidenti Repúblika mós halo ona enkontru enkontru ho sosiedade sivíl sira, entidades relijiozas hodi rona sira nia hanoin molok foti desizaun hodi hakotu krize polítika iha rai laran no PR mós promete katak desizaun ne’ebé nia foti sei bazeia ba konstituisaun no sei la haterus povu.ías


Banner

Foto

Notisia Ikus

PPN-Konselleiru KHUNTO deskute plataforma entendimentu OJE 2022

September 24, 2021
Konselleiru máximu Partidu KHUNTO, José dos Sa...

Posibilidade semana oin, Governu sei la estende tan SS iha Díli

September 24, 2021
Diretór Sala Situasaun Sentru Integradu Jestaun...

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker