GMN TV Politika Hametin demokrasia, PR Lú Olo husu ba povu atu vota fila-fali iha Eleisaun Antesipada

Hametin demokrasia, PR Lú Olo husu ba povu atu vota fila-fali iha Eleisaun Antesipada

0 views

Prezidente Repúblika (PR), Francisco Guterres ‘Lú Olo’, husu ba povu tomak atu vota fila-fali dala ida tan iha Eleisaun Antesipada (EA) atu bele haforsa liu tan demokrasia no Estadu direitu demokrátiku.

Iha loron 26 fulan Janeiro 2018, Prezidente Repúblika (PR), Francisco Guterres ‘Lú Olo, ofisialmente deklara disolve Parlamentu Nacional no Anunsiu Eleisaun Antesipada (EA), tanba ho hanoin so povu deit maka bele rezolve hodi hakotu impasse polítika rai laran.

“PR fiar metin ba povu, hanesan povu fó fiar ba PR, tanba ne’e PR fiar katak povu de’it maka bele ajuda rezolve dezafiu foun ne’ebé ita hasoru dau-daun ne’e, ho haraik-an PR husu ba povu atu vota fila-fali iha Eleisaun Antesipada (EA), ita hotu-hotu tenki ba vota fila-fali, atu haforsa ita nia demokrasia no Estadu direitu demokrátiku,” PR, Francisco Guterres ‘Lú Olo’ liu husi ninia diskursu iha Palasiu Prezidensial, Bairo Píte, Díli, Sesta (26-01-2018), hodi hakotu impase polítika ne’ebé dau-daun ne’e nasaun infrenta.

PR Lú Olo hatutan, Konstituisaun Repúblika tatoli momoos katak, povu maka nain ba poder polítiku, tuir konstituisaun no lei sira haruka, tanba ida ne’e maka prinsipiu boot liu hotu-hotu no prinsípiu ne’ebé tane Estadu direitu demokrátiku.

“Tempu to’o ona atu ita fó liman ba malu, haree oinsa loos lori ita rai Timor-Leste ba oin, ita lalika kontinua ho situasaun polítika ida ne’e, tanba hamosu ona krizi institusional,” hateten PR Lú Olo.

Nia informa katak, durante ne’e polítiku sira la interpreta loloos povu nia mensajen katak Timor-Leste presiza haklean liu tan demokrasia, envez koalia ba malu no respeitu povu nia hakarak, maibé sira fila kotuk ba malu.

“Ita hotu tenki hamutuk hodi harii nasaun doben ida ne’e. ita hotu tenki moris hakmatek nafatin, badinas nafatin no fó laran ba malu nafatin nuudar maun-bin no alin husi família ida de’it, ita tenki hatudu ba mundu tomak katak Timoroan maka kaer rasik ukun ida ne’e, Timoroan maka haburas no hametin ita nia demokrasia tuir ita nia hakarak rasik no Timoroan maka sei kaer metin paz no estabilidade atu haburas bei-beik Timor-Leste, nuudar nasaun ida ne’ebé riku no justu,”apela PR Lú Olo.

PR desidi hili opsaun EA ne’e tuir Konstituisaun Repúblika, artigu 86, alinea F: katak Disolve PN, entretantu PR mós sei marka data ba EA tuir lei haruka.

Serimonia anunsiu desizaun ikus PR ninian ba impase polítika ne’e partisipa husi membru VII Governu, membru Parlamentu Nasional, lideransa F-FDTL, lideransa PNTL, lider relizioja, sosiedade sivil no selu-seluk tan. GMN


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker