Hein promulgasaun Orsamentu Jeral Estadu (OJE) 2019 husi Prezidenti Repúblika (PR), Francisco Guterres Lu Olo, VIII Governu sei foti osan ho valor millaun US$296 husi konta Estadu hodi finansia makina Estadu durante fulan Janeiru nee.
“Salado iha hodi sustenta ba fulan Janeiru, kas iha fim do ano 2018 to’o ohin hamutuk milliaun US$ 296”, hateten Ministra Finansas Interina, Sara Lobo Brites ba Jornalista sira iha Parlamentu Nasional, Tersa (08/01/2019).
Governante ne’e haktuir tan, husi total saldo sei suficiente hodi selu salariu funsionáriu, tanba bazeia ba esperiensia duodécimo iha tinan kotuk kada fulan gasta media milliaun US$ 70.
Tuir governante, desizaun uza duodécimo ne’e husi konta Estado ne’e sei deside iha reuniaun Konsellu Ministrus iha Kuarta (10/01/2019) iha Palasio Governu, Dili.
“Enkontru ho Primeiru Ministru mos atu informa kona ba possibilidade uza duodécimo maibe sei deside”, dehan Sara Lobo Brites.
Orsamentu Jeral Estadu 2019 nee, Komisaun C Parlamentu Nasional finaliza redasaun final, no iha loron 24 Dezembro 2018 lori kedas ba Prezidenti Repúblika hodi hein promulgasaun ho veta.
Tuir lei Xefi Estado iha loron 30 hodi estuda no analiza antes promulga ou veta. OJE 2019 ho montante billaun US$ 2.1. mia
