Prezidente Repúblika (PR), Francisco Guterres Lú Olo, ohin Tersa (15/1/19), sei rona Konsellu Estadu nia hanoin kona-ba Orsamentu Jerál Estadu 2019 ho montante billiaun USD 2.1
Tuir komunikadu imprensa (KI) husi Palásiu Prezidensial, Segunda (14/1/19), haktuir, Konsellu Estadu nu’udar orgaun konsulta polítiku ba Prezidente Repúblika hodi rona opiniaun sira relasiona ho asuntu nasionais molok foti desizaun. Prezidente Repúblika sei prezide Konsellu Estadu ho pontu úniku Orsamentu Jerál Estadu 2019.
Membru Konsellu Estadu na’in-tolu, Eduardo de Deus Barreto ‘Dusae’, José Cornélio Guterres no Arcangelo de Jesus Gouveia Leite ne’ebé eleitu husi Parlamentu Nasionál molok reuniaun hahú sei simu termu posse.
Kompozisaun membru Konsellu Estadu mak Prezidente Repúblika Francisco Guterres Lú Olo,eis Prezidente Repúblika Kay rala Xanana Gusmão, eis Prezidente Repúblika José Ramos Horta, Primeiru Ministru Taur Matan Ruak, Prezidente Parlamentu Nasionál Arão Noé de Jesus da Costa Belo, Eduardo de Deus Barreta ‘Dusae’, Aurora Ximenes, José Cornélio Guterres, Arcangelo de Jesus Gouveia Leite, José dos Santos ‘Naimori Bukar’ ne’ebé eleitu husi Parlamentu Nasionál no Oscar Lima, Faustinho Godingho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes ne’ebé Prezidente Repúblika foti.
Prezidente Repúblika simu Lei Orsamentu Jerál Estadu 2019 ho montante $ 2.1 biloens husi Parlamentu Nasionál iha 24 dezembru 2018. Prezidente Repúblika sei iha loron 30 atu estuda molok foti desizaun.
Molok hala’o reuniaun Konsellu Estadu, Prezidente Repúblika rona ona entidade oioin nia hanoin kona-ba Orsamentu Jerál Estadu husi Konsellu Konsultivu Fundu Petrolíferu, organizasaun sosiedade sivil, juristas, akadémiku, konfesaun relijioza, Camara Comercio e Industria Timor-Leste, Banku Sentral Timor-Leste, husi 7-10 janeiru 2019.KI
