Primeiru Ministru (PM), Taur Matan Ruak, lakohi halo espekulasaun ba desizaun sosa asaun ConocoPhillips no Shell ho osan impréstimu, wa’inhira seidauk iha desizaun husi Prezidente Repúblika, Francisco Guterres ‘Lú Olo’ ba Orsamentu Jerál Estadu (OJE) 2019.
Xefe Governu hatan kestaun ne’e, relasiona reprezentante espesiál Governu ba asuntu petróleu Kay Rala Xanana Gusmão deklara, wa’inhira OJE 2019 no Lei Atividade Petrolíferu hetan veta husi Prezidente Repúblika, desizaun alternativu mak halo empréstimu hodi sosa asaun sira ConocoPhilips no Shell.
Tanba, atu dada kadoras mai Timor Leste no atu lori retornu mai Timor Leste.
Maibé, Primeiru Ministru Taur Matan Ruak hateten, lakohi halo espekulasaun ba desizaun sosa asaun husi kompañia sira ne’e, tanba orsamentu ba sosa asaun sira ne’e, Governu prevé ona iha (OJE) 2019.
Nune’e, Xefe Governu ne’e afirma, Xefe Estadu mós seidauk foti desizaun hasoru orsamentu jerál estadu 2019 atu veta ou promulga.
“Ida nene’e hanesan ita sik deit, espekula ne’e ladun diak ne’e piorliu ita hanesan tau fali liafuan ne’ebé la hanoin tau fali ba Prezidenti nia ibun ne’e ladun diak, dadaun ne’e iha fokus hela ba orsamentu jeral estadu tanba osan atu sosa asoens ne’e ita iha tiha ona, no orsamentu jeral estadu iha prezidenti nia liman hein nia promulgasaun ou vetu,” lia hirak ne’e, Primeiru Ministru Taur Matan Ruak, hato’o hafoin hasoru malu ho Prezidente Repúblika Francisco Guterres Lú Olo, iha Palásiu Prezidensiál Nicolau Lobato, Bairu Pite-Dili, Kinta (17/01/2019).
Taur Matan Ruak aprofunda liutan katak lakohi adianta uluk konba sosa asaun, maib’e tenke foku uluk lai ba orsamentu jerál estadu ne’ebé oras ne’e dadaun, iha Prezidente Repúblika atu foti desizaun veta ou promulga.
Entretantu, antes ne’e reprezentante espesiál Governu ba asuntu petróleu ne’ebé hanesan mos Xefe negosiadór prinsipál Kay Rala Xanana Gusmão asina ona akordu ho kompañia ConocoPhilips no Shell atu sosa sira nia asaun.
Ba kompañia kompañia ConocoPhilips no Shell ne’e, Timor Leste tenke sosa ho montante orsamentu dolar amerikanu millaun 650. Eus
