Prezidente Parlamentu Nasionál (PPN), Arão Noe, konsidera akordu ne’ebé Sekretariu Jerál Parlamentu Nasionál, Adelino Afonso de Jesus halo ho dotor Gaurav Rekhi husi ospitál Manipal Malázia ne’e ilegal, tanba ne’e PPN Arão suspende ona atu haree nia prosesu administrativu.
“Ha’u hanesan Prezidente Parlamentu laiha koñesimentu kona ba asina akordu ne’e, tanba ne’e se maka deklara kona ba asina ne’e responsabiliza ba, maske lori Parlamentu nia naran, maibe tenki iha dokumentu ofisial para depois ita bele asina, laos koalia desizaun iha konsellu administrasaun sem iha dokumentu ofisial ida ita konvida ona ema mai asina sem iha baze legal. Ha’u konsideira ilegal, tanba aktu ne’e sem liu husi prosesu administrativu ida ne’ebé formal”,dehan Arão Noe iha PN, Sesta 18/01/2019
Prezidente orgaun lejislativu ne’e dehan, nia sei haruka Sekretariu Jerál atu suspende kontratu ne’e hodi hein desizaun lolos tuir regra.
“Desizaun ne’e sei la fo impaktu ba relasaun ho Hospital Manipal Malázia, tanba ida ne’e problema internu administrativu tenki la’o tuir prosesu administrativu, ita bele kontinua nafatin importante priense kriteria administrativu nian. Ha’u lahatene tanba sa maka tenki ansi hakarak asina lalais, foin maka iha dia 24 de Dezembru aprova komisaun konkorda, normalmente tenki iha uluk akta reuniaun nian Konselu Administrasaun aprova tiha depois iha hela despaisu ida ne’ebé Prezidente Parlamentu tenki asina ho Sekretariu Jerál para autoriza Sekretariu Jerál asina akordu mas dokumentus sira ne’e seidauk iha, ha’u lahatene bazeia ba saida maka konvida ema sira mai asina kontratu ne’e, ida ne’e maka ha’u nia peguntas”, duvida Arão Noe.
Prezidente Parlamentu Nasional ne’e dehan, sera que prosesu administrativa Prezidente la persiza hatene, mas kazu ne’e ba krime Prezidente maka responsabiliza, ida ne’e maka lalos.
“Ha’u husu para prosesu tenki la’o tuir administrativu, tempu badak ha’u prepara hela karta para haruka suspende hodi hein prosesu administrativu kompletu, kona ba razaun ne’ebé hatete ospitál iha Timor laiha kapasidade, ne’e husu ba Sekretariu Jerál maka responsabilidade. Parlamentu kontratu ho hospital liur, tanba deskonsidera hospital iha ne’e lafunsiona ne’e lalos, tratamentu la’o nafatin iha ne’e so moras ne’ebé labele duni ona e durante ne’e halo duni hela transferensia ba liur, tranfserensia ba liur mos sei presiza junta medika husi Hospital, laos ba deit, tanba ne’e maka se maka foin lalais ne’e deklara buat sira ne’e tenki responsabiliza”,dehan Prezidente Parlamentu Nasionál.
Sekretariu Jerál Parlamentu Nasionál asina akordu Hospital Manipal Malázia, iha Kuarta loron 16 fulan Janeiru ne’e iha uma fukun povu nian. nes
