Reprezentante espesial VIII Governu ba asuntu petroleu, Kay Rala Xanana Gusmão, ho nia ekipa, iha loron Kuarta (09/01/19), dezloka ona ba Abu Dhabi, atu paritisipa konferensia internasionál, ne’ebé realiza kada tinan kona ba enerjia mina no gas.
Iha konferensia ne’e mós, Xanana sei ko’alia ho kompañia internasionál sira ne’ebé hakarak atu partisipa iha Greater Sunrise.
“Agora ba Abu Dhabi, iha ne’eba tinan-tinan halo konferensia internasional kona ba enerjia, iha ne’ebé kompañia sira ne’ebé iha mina no gas paritisipa hotu iha konferensia ne’e, atu diskuti no haree, agora ne’e mundu presiza saida?, gas ne’e sei presiza ka la’e? no iha ne’ebé mak falta, nomós ha’u atu halo nafatin kontaktu ho investidor sira no kompañia sira ne’ebé hakarak mai partisipa, iha Greater Sunrise, tanba barak mak hakarak”, dehan Xanana Gusmão ba jornalista sira, iha Aerposrtu Internasional Nicolau Lobato Comoro Díli, Kuarta (09/01/2019), antes atu desloka ba Abu Dhabi.
Xanana esklarese, nia kumpri hela misaun ne’e, hodi bele iha liu serteza katak, saida mak deputadu sira ko’alia iha Parlamentu Nasional katak, gasta osan barak. Tanba ne’e, Xefi Negosiador Prinsipal FM dehan, nia tenki iha serteza katak, Greater Sunrise ne’e tama ho osan hira, atu bele hala’o buat ne’ebé, nia senti povu simu.
Konferensia Internasional ne’e, sei hala’o durante loron rua, hahú husi loron 11 to’o loron 12 fulan Janeiru tinan ne’e.
“Tanba ne’e ami ba sedu oituan para iha tiha konferensia ne’e, iha tan enkontru ho ajensia dezenvolvimentu iha ne’eba, ne’ebé ami hasoru malu dala barak ona, ho mós rai balun, inklui maluk kompañia sira ne’ebé hakarak ko’alia, depois ida ne’e, iha ona Grupo de Traballu, Domingo loron 13 fulan Janieru, sei fila hikas mai Timor”,relata Xanana.oly
