GMN TV Politika CNRT ezije PM Taur remodela VIII Governu tanba lakon ona konfiansa

CNRT ezije PM Taur remodela VIII Governu tanba lakon ona konfiansa

0 views

Vise Xefe bankada CNRT, Patrocino Fernandes, ezije Primeiru Ministru, Taur Matan Ruak atu implementa ona polítika ne’ebé deside iha konferensia Aliansa Mudansa ba Progresu (AMP) nian iha Tibar, hodi remodela ona estrutura VIII Governu, tanba hamihis no halakon ona konfiansa husi partidu CNRT, ne’ebé parte mós husi koligasaun AMP ne’ebé kaer hela governasaun da-ualu ne’e.

Tuir deputadu CNRT ne’e nia haree, iha membru Governu balun ne’ebé kontribui atu halo remodelasaun ho lalais, tanba servisu la kumpri nia dever ho loloos, liu-liu tanba Governu husu Parlamentu Nasionál (PN), atu halo diskusaun ba Orsamentu Jerál Estadu(OJE) tinan 2020 nian ho pedidu urjensia, maibé membru Governu balun rasik la marka prezensa durante audiênsia públika  entre membru governu ho deputadu sira iha komisaun espesializadas.

“Iha diskusaun OJE 2018 nian, kuandu ita halo diskusaun OJE primeira vez, VIII Governu Konstitusional ninian, iha ne’ebá ha’u iha espetativa ida bo’ot tebes ba membru VIII Governu nian, tanba ha’u haree husi postura Governu ne’e, ema ida mesak joven de’it, ne’ebé haree katak, bele fó espetativa ida ba ha’u, atu lori governasaun ne’e di’ak, no atu bele atinji metas sira ne’ebé ita hatúr iha programa VIII Governu nian, halo ha’u senti katak konfiansa bo’ot tebes, maibé governasaun ne’e la’o mai to’o 2018 mai 2019 to’o mai agora ne’e, halo ha’u nia konfiansa ne’e mihis ba bebeik ba membru governu sira. Tanba joven sira servisu oituan ezije feriadu barak liu, sentidu responsabilidade ne’e lakon tiha. Sim, ita rekoñese katak, lei fó direitu ba ema hotu-hotu, maibé iha momentu ne’ebé ita presiza sakrifika, ita-nia direitu sira ne’e ita lakonsege, tanba ita serví hela dadauk Estadu ne’e. Tanba orsamentu ne’e importante ba ministru sira atu responsabiliza sira-nia orsamentu tuir programa, maibé ministru rasik laiha, ministru mesak joven de’it”, kestiona Patrocino Fernandes iha diskusaun OJE 2020 ba faze daruak nian iha jeneralidade, Kinta(16/01/2020).

Deputadu CNRT ne’e kestiona maka’as, maske governasaun da-ualu la’o kuaze tinan 2 ona, maibé servisu Administrasaun públika kontinua la’o rungu-ranga loos.

“Problema Administrasaun públika iha fatin hotu-hotu la’o rungu-ranga loos, tanba kuaze besik tinan rua ona, maibé kargu Xefia sira besik fulan tolu-tolu ka hat-hat mak foin simu despaixu estensaun interinu, nune’e la-motiva ema atu servisu ho di’ak, tanba laiha kbi’it polítika atu hola desizaun ba servisu sira ne’e, tanba ne’e, krítikas no avaliasaun sira ne’e pertinente tebes, ba avaliasaun membru Governu sira para bele haree”, tenik Fernandes.

Iha fatin hanesan, deputadu bankada KHUNTO, Luis Roberto da Silva mós husu Primeiru Ministru Taur Matan Ruak atu rezolve ona lista kandidatu membru oitavu Governu pendente sira, tanba governasaun la’o kuaze tinan rua ona.

“Ami husi bankada apoiu Governu nian, husu oinsa para halo kompleta ona membru Governu, nune’e ezekusaun orsamentu ne’e la’o di’ak liutan. Kona-bá remodelasaun internu Governu ninian, ami iha PN, haree de’it katak, remodelasaun ne’e atu hahú aban ka bainrua mós ami nu’udar polítika so akompaña de’it, tanba ne’e kompetensia PM nian, no Governu nian, ami presiza mak diskusaun OJE ne’e ho di’ak, no hadi’ak jestaun iha nível ministériu hotu-hotu, para ba futuru bele responde hotu ba nesessidades báziku hotu povu nian, ida ne’e mak importante liu”,akresenta deputadu KHUNTO ne’e.

Hatán ba kestaun ne’e, Primeiru Ministru Taur Matan Ruak afirma, momentu diskusaun ba orsamentu, la’os tempu atu diskute lista pendente ka remodelasaun.

“ Asuntu ne’e la’os atu ko’alia iha ne’e, AMP nian, ba ko’alia iha AMP ne’eba, maibé ita bo’ot sira levanta iha ne’e, husu primeiru ministru iha solusaun?, ha’u iha maibé la’os fatin atu ko’alia iha ne’e. Falta ministru sira ne’e, naturalmente afeita, bola karik, ema nia 11 ita joga ho 6, se señor deputadu sira senti, ha’u PM la senti fali ne’e, ne’e impossível, se deputadu sira preokupa, ha’u hanesan PM, preokupa liutan. Ida ne’e iha ligasaun ho remodelasaun, kompleta de’it ita seidauk kompleta, depois remodela tan!, maibé Ita bele halo rua ne’e dala ida”, Dehan PM Taur Matan Ruak.

Antes ne’e , koligasaun AMP ne’ebé kompostu husi partidu CNRT, PLP no Khunto,  halo ona konferensia nasionál ida, atu halo avaliasaun ba servisu membru VIII Governu nian, husi  rezultadu  ne’e  rasik  AMP  deside atu halo remodelasaun ba membru VIII Governu,  maibé  to’o agora seidauk realiza.say


Banner

Foto

Notisia Ikus

Governu aprova pagamentu suplementár ba funsionariu no ajente MF

November 26, 2021
Governu sei halo pagamentu suplementár ba funsi...

Governu aprova estatutu orgánika F-FDTL

November 26, 2021
Liu husi reuniaun Konsellu Ministru (KM), deside...

Governu aprova kriasaun liña kréditu

November 26, 2021
Atu fasilita finansiamentu, ba Empreza Míkro ka...

SEPS husu PN halo revizaun ba LPL tanba halo konfuzaun

November 26, 2021
Sekretáriu Estadu Protesaun Sivíl (SEPS) Joaqu...

Horta husu Governu apoia agrikultór sira

November 26, 2021
Laureadu Nobel da Paz, José Ramos Horta, hatete...
1 2 3 665

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker