GMN TV Politika Horta sadik Taur litik Governante hatudu progresu servisu

Horta sadik Taur litik Governante hatudu progresu servisu

0 views

Eis Prezidente Repúblika (PR), José Ramos Horta, sadik Primeiru Ministru (PM) Taur Matan Ruak, atu litik membru Governu sira hatudu progresu servisu liu-liu iha ezekusaun orsamentu tinan 2020 kuandu promulgadu husi Prezidente Repúblika, Francisco Guterres Lú Olo.

“Maun boot Xanana ho Taur Matan Ruak tenke rigorozu servisu hamutuk hodi litik ministru sira para ezekuta sira-nia responsabilidade servisu”,dehan Ramos Horta ba jornalista sira Kinta (16/1/2020) iha Centro Convenções de Díli.

Eis diplomata senior Timor-Leste ne’e afirma, kona ba membru Governu sira-nia ezekusaun ne’e atu la’o diak no loos, sosiedade sivíl mos tenke iha papel importante atu akompaña no halo krítika ba servisu governante sira nian.

“Koalia kona ba ezekusaun orsamental, ne’e bele hatete mos teóriku, akadémiku. Sosiedade sivíl mak tenke haree didiak ministériu ida hatete, ami ezekuta 90% ne’e diak, ita bele hahú basa liman. Maibe depois investiga, 90% ne’e iha ne’ebé los? Saida los? Ou sosa kareta? Ou halo viajen? Ou rekruta tan asesór? Portantu ita labele rona deit. Haú prefere rona 70% ezekusaun orsamental neébé ezekusaun ne’e diak iha infraestrutura ou seluk tan”,dehan tan Ramos Horta.

Ramos Horta haktuir, kona-ba VIII Governu nia dezempeña servisu durante ne’e halo nia hakfodak tanba hatama asesór lobuk ida hodi halo servisu.

“Eipa se ó hatama asesór lobuk ida, tanba sa ó krítika bebeik ema laiha? entaun asesór ne’e halo saida? Asesór 1000 kedas, entaun sira bele servisu be sira nain haat, nain lima que Prezidente (Repúblika) la fó pose neé, la signifika haú konkorda ho Prezidente nia pozisaun ne’e. Mas labele halo diskursu katak, oiii ami labele halo ezekusaun tanba ami-nia ministru falta. Hah ita boot sira iha Vise Ministru, iha Sekretáriu Estadu, iha asesór prinsipal hanesan boot liu fali be ministru la simu pose ne’e. Tanba ha’u realista, ha’u koñese rai (nasaun) 135, balu independente tinan 100 ona. Mas ha’u haree situasaun Timor frájil duni, mas sorti boot que primeiru laiha funu, ita laos hanesan Guiné Bissau, nia Prezidente hatún Primeiru Ministru, lae Timor la’os nuneé”,konta Ramos Horta.

Nia dehan, Primeiru Ministru, Taur Matan Ruak, tenke haree rigorozu liu tan ba VIII Governu ne’e nia servisu.

“PM Taur tenke haree diak liu tan, tenke rigorozu tan. Maun bo’ot Xanana halo parte iha koligasaun ne’e tenke haree halo presaun ba ministru sira. Ha’u-nia hanoin que maun Xanana devia kada semana ba vizita ministériu sira ne’e tur oras rua, oras tolu ho ministru ne’e koalia, koalia mos ho diretór sira atu esplika ba ha’u imi-nia ezekusaun orsamental ne’e? Haú hatene nia (Xanana) okupadu teb-tebes ba (projetu) tasi mane. Maibe bele sa’e karik bele ba vizita ministériu, no ne’e bele fó apoiu maka’as ba Governu. Ha’u hanoin (se nune’e) tinan ida ne’e  ezekusaun (kada ministériu) la’o diak no ekonomia bele la’o diak liu”, tenik eis Ministru Negósiu Estranjeiru ne’e.

Ramos Horta mos husu ba ministériu sira neébé nia orsamentu hetan redusaun labele hirus. Maibe presiza mak tenke ezekuta ho diak no lolos hodi hatudu provas ba PM Taur, ba PR Lú Olo, ba bankada parlamentar, nune’e se presiza tan orsamentu retifikativu, sira bele fó tan.

“Lalika preokupadu demais ho orsamentu ne’ebé tún. Tanba de cualquer maneira tarde tiha ona. Tuir kalendáriu iha fulan marsu mak orsamentu foin iha, no ne’e, se liu. Diak liu lalika lakon tempu. Obstákulu boot mak tenke konvense prezidente (Lú Olo). Prezidente koalia sai ona, nia krítika ba orsamentu sira ne’e, ne’e duni bele problema ida tan”,observa Ramos Horta.GMN


Banner

Foto

Notisia Ikus

Governu sei dezenvolve Sentru Agríkola Quinta Shalom Farm Hera

September 20, 2021
Primeiru Ministru (PM), Taur Matan Ruak, hatete,...

PN haree Governu book-an “maten liu” antisipa dezastre naturais

September 20, 2021
Parlamentu Nasionál (PN) haree Governu book-an ...

Vizita izolamentu Lahane, PM Taur rekomenda pontu importante tolu

September 20, 2021
Primeiru Ministru (PM), Taur Matan Ruak, hala’...

Konta deit istória, sai dezafiu ba konstrusaun Estadu

September 19, 2021
Sekretáriu Jerál Partidu Uniaun Demokrata Timo...

CNRT seidauk iha kandidatu ba PR

September 19, 2021
Komisaun Polítika Nasionál (KPN) Partidu CNRT,...
1 2 3 641

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker