GMN TV Politika Krizi polítika-ekonomia dura to’o agora, Ramos Horta: Hún ne’e mai husi PR Lú Olo

Krizi polítika-ekonomia dura to’o agora, Ramos Horta: Hún ne’e mai husi PR Lú Olo

1 views

Eis Prezidente Repúblika (PR), José Ramos Horta, deklara, krizi polítika, ekonomia no sosial iha Timor-Leste ne’ebé dura to’o ohin loron ne’e, nia hún lolos mai husi Prezidente Repúblika, Francisco Guterres Lú Olo, ne’ebé la fó pose ba membru Governu husi Aliansa Mudansa ba Progresu (AMP).

“Problema hahú iha aitarak laran (Palásiu Prezidensial) ne’ebé Prezidente (Lú Olo) nia pozisaun, desizaun la fó pose. Ha’u lahatete prezidente laiha razaun, maibe ha’u nia opiniaun mak devia fó pose. Maibe Prezidente iha konviksaun no nia interpretasaun, entaun hahú provoka tensaun ho AMP, liu-liu CNRT mak lakon lobuk ida. Maibe ha’u nu’udar ema ida que esperiénsia liu karik prezidente, idade liu, ha’u hatete, diak liu amu prezidente haree rekonsidera didiak, husik ba Prokurador Jeral Repúblika, husik ba Tribunal sira mak deside se ema ne’e kulpadu ka lae? (Prezidente) fó pose ba ita rezolve problema”,dehan eis PR Horta iha Grande Entrevista GMN TV ne’ebé hala’o iha Bebora, Díli, Segunda (6/1/2020).

Ramos Horta fó hanoin katak, PR Lú Olo mak fó ona pose bele loke dalan ba diálogu hodi hetan konsensu nasional ida ne’ebé PR Lú Olo rasik mak hanesan dada dalan ba konsensu nasional ne’e.

Laureadu nobel da paz ne’e afirma, nia la koalia lor-loron ho líder karismátiku Kay Rala Xanana Gusmão kona ba polítika rai laran nian, tanba Xanana okupadu ho servisu.

“Ha’u la koalia lor-loron ho maun boot Xanana, maibe buat ne’ebé lee, ita rona saida mak nia hatete, ita haree hahalo parlamentu nian husi bankada AMP nian veta viajen prezidente entaun abut mak ida ne’e, ita labele subar fali”,dehan eis Ministru Negósiu Estranjeiru iha primeiru Governu konstitusional ne’e.

Nia dehan, problema polítika interna ne’ebé la’o ladun diak iha rai laran ne’e la’os tanba arogansia husi líder jerasaun tuan sira.

Ramos Horta mos fó solusaun hodi hakotu krizi polítiku no ekonómiku ida ne’e mak presiza hanoin klean hodi hakiduk mai kotuk hafoin aranka ba oin hodi rezolve pproblema hirak ne’e, liu-liu líder partidu polítiku sira ne’e. Tanba se lae povu mak sai vítima ho hahalok hirak nune’e.

Eis diplomata senior Timor-Leste ne’e mos afirma, ho situasaun rai-laran ne’ebé la’o ladun diak hanesan ne’e Timor-Leste nia adezaun ba ASEAN sei la akontese, kuandu Governu paralizadu.

“Ne’e sei la akontese se Governu paralizadu. Tanba Embaxada sira haree akompaña ne’e influensia tebes. Singapura akompaña 100% situasaun iha Timor. Se ita la rezolve problema polítiku nune’e, ita-nia kolaborasaun, kontribuisaun ba ASEAN saida? Entaun diak liu lalikan tama (ASEAN), tinan lima ka sanulu tan, no se nia responsabilidade? Ne’e Governu aktual, Prezidente Repúblika, no sira ne’ebé oras ne’e kaer poder Estadu. Se mak kaer poder Estadu? Prezidente Repúblika, Parlamentu Nasional no Primeiru Ministru”,dehan Ramos Horta.GMN


Banner

Foto

Notisia Ikus

Governu sei dezenvolve Sentru Agríkola Quinta Shalom Farm Hera

September 20, 2021
Primeiru Ministru (PM), Taur Matan Ruak, hatete,...

PN haree Governu book-an “maten liu” antisipa dezastre naturais

September 20, 2021
Parlamentu Nasionál (PN) haree Governu book-an ...

Vizita izolamentu Lahane, PM Taur rekomenda pontu importante tolu

September 20, 2021
Primeiru Ministru (PM), Taur Matan Ruak, hala’...

Konta deit istória, sai dezafiu ba konstrusaun Estadu

September 19, 2021
Sekretáriu Jerál Partidu Uniaun Demokrata Timo...

CNRT seidauk iha kandidatu ba PR

September 19, 2021
Komisaun Polítika Nasionál (KPN) Partidu CNRT,...
1 2 3 641

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker