Jurista Manuel Tilman, hateten, Orsamentu Jerál Estadu (OJE) tinan 2020 neebé durante loron tolu (3) halo diskusaun iha uma fukun Parlamentu Nasionál (PN), maibé to’o ikus la pasa, tanba ne’e tenke hakat ba Eleisaun Antesipada (EA).
“Koresponde tinan ekonómiku ne’e duni OJE aprova hanesan proposta lei ba PN neebé rejeitadu, durante tinan ne’e, proposta OJE la fila ba PN, signifika ita laiha OJE aprovadu, ita ba konstitusaun artigu 86, iha alinea F hateten, durante fulan 2 ka loron 60 Xefe Estadu hafoin konvoka partidu hotu-hotu ne’ebé hetan asentu parlamentar iha PN”, Jurista ne’e ba GMN iha ninia rezidénsia Praia dos Coqueiros, Díli, Sábadu.
Tilman akresenta, Prezidente Repúblika (PR) sei konsulta Konsellu Estadu hodi disolve PN, hafoin PR, Francisco Guterres Lú Olo sei iha loron 30, atu foti desizaun ba Eleisaun Antesipada (EA).
Tuir konstituisaun RDTL artigu 97, númeru 3, projetu lei orsamentu neebé rejeita iha PN no orsamentu labele fila ona ba PN, iha tinan ne’e iha sesaun parlamentár ida ne’e ba diskute fali iha PN sesaun parlamentár lima (5), kada PN ida (1) iha sesaun lima (5), kada sesaun tinan ida (1).
OJE 2020 hamutuk biliaun USD 1.668 nee la pasa iha Parlamentu Nasionál (PN) ho votus a favor 13, kontra 15 no abstensaun 25. ety
