Foto:Facebook
Parlamentu Nasionál (PN), liu husi Deputadu bankada PUDD, António de Sá Benevides, dúvida ho kapasidade Vise Ministra no Vise Ministru Saúde nian, atu ezekuta no rezolve problema saúde iha tinan 2020, tanba mosu hadau malu podér hanesan ministru ka minstra interina saúde nian.
Deputadu opozisaun ne’e mós preokupa, tanba iha setór saúde iha povu barak sei halerik ba aimoruk no ambulansia, inklui sentru saúde rasik, no sei iha problema barak tebes mak seidauk konsege rezolve, maibé governante na’in rua ne’e rasik la koopera malu.
“Povu barak preokupa oituan kona-bá ministériu saúde, sira dehan agora, aimoruk laiha, osan la tau, buat hotu laiha, maibé ha’u hateten de’it dehan ami sei tau osan, maibé povu sira mós husu fali, tau osan oinsa, serake Vise ministru ho ministra bele servisu hamutuk ka la’e?, tanba agora sira hadau malu podér. Tanba ne’e, importante atu osan, maibé kuandu lideransa la servisu hamutuk ne’e sai preokupasaun”, afirma António de Sá durante diskusaun OJE 2020 ba loron ikus nian.
Reprezentante povu ne’e mós proekupa, bainhira sistema iha ministériu saúde ne’ebé la’o di’ak ona dezde governasaun anterior, sai baralla fali tanba aktu governante na’in rua ne’e rasik.
“Ministériu saúde dezde primeiru Governu Konstitusionál to’o mai agora sistema ne’e tau kapáz ona, ita lakohi katak, ministra ho vise ministru ba para depois halo baralla fali tan sistema iha ne’ebá, ita tau osan depois la ezekuta ne’e mós probelma boot”, tenik Benevides.
Antes ne’e, mosu dezentendementu entre vise minitru no vise ministra na’in rua, tanba hadau malu podér hanesan ministru ka ministra saúde interina nian.
Entertantu, husi orsamentu tinan 2020 nian ne’ebé kuaze biliaun USD 1.668 ne’e, propoin ba ministériu saúde, hamutuk millaun USD 58.413 liu, kompostu husi saláriu vensimentu millaun USD 23.992 liu, bens servisu millaun USD 14.723 resin, transferensias públikas millaun USD 11.282 liu, inklui kapitál menór millaun USD 2.661 resin no kapitál dezenvolvimentu millaun USD 5.756 resin.say
