Eis Prezidente Repúblika (PR), José Ramos Horta, hateten, Timor-Leste (TL) hanesan nasaun ne’ebé sei frájil no seida’uk iha ekipamentu ne’ebé avansadu atu detekta droga ne’ebé tama-sai.
Horta hatutan, droga sei kontinua tama no sai Timor-Leste tanba Estadu Timor-Leste seidauk iha lei pena de morte.
“Tanba sira hatene pena de morte laiha, laiha tortura, entaun bele mai tau droga iha ne’e, entaun Timor sai Estadu ida frájil ba ida ne’e,” dehan, José Ramos Horta iha Centro Convenções de Dili, foin lalais.
Maske nune’e, Ramos Horta kongratula instituisaun Polisia Nasional Timor Leste (PNTL) liu husi polisia migrasaun no polisia servisu investigasaun kriminal (PSIK) nian ne’ebé hala’o sira nia servisu diak.
“Ha’u fo parabens ba ita nia polisia sira ne’ebé kaer migrasaun, PNSIK, ha’u hanoin sira halo servisu diak, presija meiu liu tan tanbá sira deteta droga lubuk ida ona liu-liu ema husi liur mak dada mai iha ne’e,” hateten, Ramos Horta.
Tamba ne’e, presiza kria kooperasaun diak ho nasaun viziñu hanesan Austrália ho Indonézia hodi hetan apoiu tanbá nasaun hirak ne’e iha ona ekipamentus ne’ebé avansadu atu deteta droga .
“Timor tenke buka apoiu makaas husi federal Austrália nian Indonézia ha’u hatene sira iha kolaborasaun diak ona para hametin fronteira terestre, tasi no aero, problema droga iha Timor la boot hanesan iha nasaun seluk maibé se ita la kuidadu bele sai bo’ot no ne’e estraga juventude nia vida,” dehan Horta.
Laureadu Nobel da Páz ne’e mós espera Governu bele iha ona planu atu apoiu ekipamentu ne’ebé avansadu hodi bele deteta droga sira ne’ebé tama sai iha Timor-Leste nune’e Timor-Leste labele sai fatin ba tránzitu droga. Ida
