GMN TV Politika La halo pagamentu ba empreza sira, PN konsidera Governu devedór

La halo pagamentu ba empreza sira, PN konsidera Governu devedór

0 views

Deputada bankada CNRT iha Parlamentu Nasional (PN), Fernanda Lay, lamenta maka’as tanba to’o ohin loron Governu sei kontinua deve empreza sira ne’ebé mak ajuda Governu iha situasaun emerjénsia COVID-19, hodi fornese hahán ba iha kuarentena no otel sira, maibé ladauk halo pagamentu.

CNRT admira, tanba PN aprova orsamentu ba fundu COVID dala rua, maibé ladauk selu hotu empreza sira, tan ne’e CNRT husu ba instituisaun de kontrolu hanesan CAC ho PDHJ, inklui Tribunal das Contas, atu akompaña prosesu ezekusaun fundu COVID-19.

“Tuir relatóriu ne’e hateten hanesan ne’e, iha razaun balansu disponível seidauk ezekuta ate 30 de Novembro, iha instituisoens 10 resin, hanesan iha F-FDTL iha USD 35.1 milhões, balansu ne’ebé sei la ezekuta ona no konsidera saving, ami husu ona Ministru Finansa ne’e saida? mai tan Ministériu Justisa, MOP, SECoop, SEAC, MAE, MTCI ho INSSI iha montante lubuk iha ne’ebá hateten katak sei la ezekuta ona no konsidera saving. Saving kuandu la uza osan ne’e, maibé agora sei deve hela ema barak ne’e, halo nusa mak ita hateten dehan ida ne’e poupansa, ou Governu mak jere la hatene, ida ne’e mak komplikadu bo’ot”, deklara deputada Fernanda Lay ba GMN iha PN, Kinta (14/01/2021).

Nia esplika, tuir loloos ho balansu ne’ebé iha, dívida ne’ebé Governu iha ba fundu COVID ne’e rasik nia ezekusaun ba asuntu saida de’it ne’ebé liga ho COVID nian tenke selu.

Nune’e nia dehan, ho pagamentu ne’ebé tarde ne’e parte ida hamate setór privadu sira, tanba Governu halo tusan no la selu.

“Horibainhira emerjénsia mak ba otel sira ne’e, no fim balun seidauk selu, iha otel balun ha’u la hatene to’o fulan hira mak atu selu, asuntu ne’e mós la’os bankada opozisaun de’it mak foti, bankada Governu rasik mós foti, inklui ai-han ne’ebé fornese ba kuarentena sira, hanesan Mota-Ain ne’e mós seidauk selu to’o agora la hatene razaun tanba sa? Osan laiha oin seluk, maibé agora osan iha, ita dehan saving hodi halo poupansa, maibé por outro lado ita deve hela ema terseira pessoas ne’ebé servisu presiza osan”.

Deputada opozisaun ne’e admira, Governu iha osan, maibé la halo pagamentu ba setór privadu sira ne’ebé tulun ona Governu iha situasaun emerjénsia.

“Sira ho razaun seidauk seluk kompañia, tanba ho razaun dokumentu laiha, iha momentu diskusaun ha’u mós halo pergunta ba sira (Governu) katak momentu ita boot sira lori ema moras tama ne’e karik presiza dokumentu? ka la’e, fatin ne’ebé de’it ita bele uza, ida ne’e mak ita uza iha situasaun emerjénsia, hodi presta socorros ba ema ne’ebé moras”.

“Tanba fasilidade Governu nian la to’o mak ita presiza fatin no ema sira ne’e setór privadu oferese ona sira nia fatin, para Governu bele halo kuarentena, maibé agora dehan osan laiha ne’e mak hau mós hakfodak, ne’e mak ha’u sempre dehan osan mak laiha ka ita boot (Governu) sira mak la konsege halo jestaun, maibé relatóriu ne’e Governu rasik mak haruka mai, hosi Abril to’o agora ita sei iha dívidas, ne’e ba ha’u estrañu”, afirma Fernanda Lay.

Alénde ne’e deputada FRETILIN, Lídia Norberta, afirma, Governu ezekuta fundu faze por faze, tanba pandemia COVID seidauk hatene bainhira mak atu termina, ho nune’e Governu presiza halo jestaun ho diak.

Maske nune’e nia parte rekoñese iha empreza balun seidauk hetan pagamentu. “Bainhira deputadu sira kaer ba relatóriu trimestral 2020, iha ne’ebá kontempla transferénsia fundu petrolíferu dala rua ida USD 150 milhões, ida fali USD 69.500, kuandu ita haree ba relatóriu trimestral ne’ebé halo ne’e, entaun nia ezekusaun ne’e 38% hanesan deputuda sira dehan ne’e, maibé bainhira ita haree hosi nia soma transferénsia rua, 150+69.500+133 mill, entaun ninian balansu iha 2020 ne’e, 58%.

Deputada ne’e hatutan, iha tinan 2021, iha portal tranparénsia persentajen ne’e sa’e tiha ona, persentajen ba fundu COVID ne’e agora sa’e por volta pursentu 78.

“COVID ne’e la’os Timor de’it mak iha,  depois ne’e seidauk hotu, entaun sera que ita iha ona fundu COVID ita tenke ezekuta hotu kedas, enkuantu moras ne’e seidauk lakon, ne’e laiha lójika, se moras ne’e kontinua eziste, ita mós presiza halo jestaun ho didi’ak, no justu, para hodi nune’e ba oin mós hau sei iha nafatin saldo ka orsamentu balun hodi atende ba nesesidade, tanba hasoru hela problema COVID ne’e, ita seidauk hatene bainhira mak atu hotu, seidauk iha determinasaun, ne’e duni labele ezekuta hotu kedas fundu ne’e”.

“Buat ida COVID ne’e halo nasaun barak mak frazil, frazil atu bele salva ninia populasaun no oinsa mak atu bele asegura ai-han ba nia populasaun, ne’e problema comum ne’ebé rai hotu enfrenta, tanba ne’e la’os Timor de’it mak halo asaun, ita mak uza naran sesta bázika ne’e, iha mós nasaun barak mak halo maneira oi-oin hodi salva nia populasaun para labele mate hamlaha”, hakotu deputada bankada FRETILIN ne’e.

Antes ne’e, liu hosi diskusaun kona-bá implementasaun medida prevensaun COVID iha PN semana ne’e, Ministru Finansa, Rui Gomes, kompromete iha tempu badak Governu sei aprezenta relatóriu detallu kona-bá ezekusaun fundu COVID-19, hodi fasilita deputadu sira nia kna’ar fiskalizasaun ba despeza públika.

PN aprova pedidu transferénsia estraordinária hosi fundu Petrolíferu ba dahuluk hamutuk USD tokon 250, maibé USD tokon 100 reforsa kofre Estadu, USD tokon 100 ba fundu COVID, inklui USD tokon 50 ba rekuperasaun ekonómika no iha transferénsia daruak, PN aprova tan montante USD tokon 286.8 no aloka ba fundu COVID hamutuk USD tokon 69.500. say


Banner

Foto

Notisia Ikus

Xanana aprezenta progresu negosiasaun fronteira marítima no terrestre ba PN

January 22, 2022
[caption id="attachment_59134" align="aligncenter"...

Campanha das eleições presidenciais prevista para início de março

January 22, 2022
A campanha das eleições presidenciais terá in...

KM aprova ona karta reforma husi Lere, desizaun ikus iha PR Lú Olo

January 22, 2022
[caption id="attachment_59120" align="aligncenter"...

Armanda Berta deklara kandidata-an ba PR, promete kumpre deit K-RDTL

January 21, 2022
Prezidente Partidu Kmanek Haburas Unidade Nasion...

Laiha konbustível ba kareta funeráriu, PN kritika MSSI halo servisu la hatene

January 21, 2022
Parlamentu Nasionál (PN), kestiona maka’as ka...
1 2 3 684

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker