GMN TV Politika Eletrisidade Manleuana kontinua lakan-mate

Eletrisidade Manleuana kontinua lakan-mate

0 views

Xefi Suku Manleuana, Munisípiu Dili, Jacob Tilman Soares, informa, hahú husi tinan 2017, eletrisidade iha Suku Manleuana, kontinua lakan-mate. Tamba ne’e, Governu presiza halo atendimentu lalais.

“Iha Suku Manleuana ne’e, ahi mate deste iha 2017 kedas akontese ahi ne’e mate kuaze oras ida nia laran loron ida mate dala 4,  mate tiha moris fali ida ne’e kalan-kalan akontese hela deit  ne’e estraga komunidade sira nia sasan Televizaun, Radiu Jelera no buat seluk tan. ho situasaun sira  ne’e kalan ita atu asesu informasaun no programa ruma husi Estadu iha Televizaun labele tanba  ahi derpenti mate depois oras ida lakan fali, liu-liu iha Aldeia tolu hanesan, Aldeia Mauk, Ramelau, no Laulora, ho nia Populasaun hamutuk ema 2.460,”hateten Jacob Tilman Soares ba GMN iha nia kna’ar fatin Sede Suku Manleuana, Kinta (01/02).

Tanba ne’e, Jacob  husu ba Diresaun EDTL  atu halo kontrolu hodi haree situasaun ne’e, atu rekomenda ba Governu hodi troka tiha trafo  iha Suku Manleuana nian ne’e.

Nia haktuir, populasaun iha Suku Manleuana preokupa tebes ho situasaun ne’e, tanba iha Suku seluk eletrisidade lakan estavel.

Iha fatin seluk, komunidade João da Conceicão, hateten, durante ne’e eletrisidade iha Suku Manleuana sempre mate hela deit.

“Durante ne’e ami-nia ahi mate lakan hela de’it, nunka mais loron ida la mate ne’e laiha. Ida ne’e estraga ami-nia televizaun, Jelera no ami nia oan sira atu halo sira nia trabalho eskola nian no estuda mos labele, tanba ahi mate bei-beik, halo labarik sira baruk atu estuda. Tanba ne’e ami husu ba Diresaun EDTL nian liu-liu sira,  tekniku atu bele kontrola hodi haree iha terenu la’os tur deit iha kantor para oras to’o fila ba uma,” katak João

Hatan ba preokupasaun ne’e Diretor Jeral EDTL, Virgilio  Guteres, informa, nia orienta ona tékniku EDTL sira atu rezolve.

“Ami-nia tékniku sira ba haree ona, no agora teknik sira komesa halo intervensaun hela iha parte Becora nian, no iha área Tuana-Laran no sei kobre hotu iha kapital Dili ba área ne’ebé mak hetan problema inklui Manleuana no Bebonuk,” katak Virgilio.     

Komunidade Aldeia Mane-Mesak falta bee mos 

Iha sorin seluk, Komunidade Aldeia Mane-Mesak, Suku Manleuana, Postu Administrativu Dom-Aleixo, Munisípiu Dili, durante semana ida ona la asesu ba bee mos maske Serviço Agua e Saneamento (SAS) dada ona bee ba komunidade iha tinan 2016.

Xefe Aldeia Mane-Mesak, Paulino Pereira, informa, kuaze semana ida ona komunidade Aldeia Mane Mesak, la asesu bee mos,  tanba tornera ida deit mak halo operasaun.

“Lolos ne’e monta tornera rua nune’e halo distribuisaun be’e ba komunidade ne’e ho diak para komunidade iha área ne’eba bele hetan hotu bee. Durante semana ida sira ba buka be’e kuru iha Aldeia seluk, tanba buat ida be’e ne’e mak laiha ne’e ita moris oinsa, ita nia povu nia ezijensia ne’e mak  buat ida bee mos, ahi no estrada para povu bele senti rezultadu independensia, sira la buka kadeira,” hateten Paulino Pereira Tilman ba GMN iha nia kna’ar fatin Manleuan Dili, Segunda (05/02).

Nia hatutan,  ema moris presiza bee, tanba bee ne’e nia funsaun barak ba ema nia moris lor-loron.

“Dala ruma labarik sira atu ba eskola la haris, tanba bee laiha. Sira-nia roupa eskola la fase, foer mos sira tau lori ba eskola,”dehan nia.

Hatan ba preokupasaun ne’e, Xefe Distribuisaun Bee mos Kapital Dili, Orlando Lopes, hatete,  tékniku sira husi SAS tau matan ona ba probelema ne’e.

“Ami sei koordena hamutuk ho tékniku hodi responde preokupasaun komunidade iha kapital Dili nian, inklui área Manleuana nian no fatin sira seluk, para bele asesu bee mos,”katak Orlando.

José Reis orienta tékniku EDTL  hadia

Iha parte seluk, Ministru Adjuntu Primeiru Ministru, no Ministru Asuntu Governasaun, José Reis, fó orientasaun ona ba ekipa tékniku EDTL atu hadia airin sira ne’ebé monu iha tempu udan no anin bo’ot ne’e, atu povu bele asesu ba eletrisidade.

“Ho anin bo’ot ne’ebé mak akontese loron hirak liu ba,  afeta ai-rin eletrisidade monu, nune’e ha’u  orienta ona ekipa tékniku atu hadia ai-rin eletrisidade iha territóriu tomak ne’ebé hetan estragus husi anin bo’ot, tanba anin bo’ot ne’e alende estraga komunidade nia uma, estraga mós ai-rin eletrisidade balun iha Munisípiu sira, inklui kapital Dili,” hateten José Reis ba GMN iha Bebora Dili Kuarta, (31/01).

José Reis mós apela ba populasaun sira iha territóriu tomak atu pasiensia hodi hein, tanba ekipa tékniku EDTL sira sei hadia ai-rin eletrisidade sira ne’ebé hetan estragus atu eletrisidade ne’e bele lakan normal fali.

Antes ne’e,  Autoridade Nasional Meteorolójika fó hanoin katak, anin boot ne’ebé akontese iha loron hirak nia laran, tanba influensia husi presaun ar entre kontinente Asia no Australia. Autoridade Meteorolójika mós husu atensaun ba komunidade sira liu-liu peskador sira iha tasi ibun área Sul no Norte atu hapara lai atividade peska iha tasi laran.aba


Banner

Foto

Notisia Ikus

PPN: Singapura rejeita TL adere ba ASEAN ne’e normál

August 5, 2021
Prezidenti Parlamentu Nasional (PPN) Aniceto Gut...

FRETILIN husu Governu hadi’ak implementasaun SB

August 5, 2021
Bankada FRETILIN, sujere Governu atu avalia impl...

Governu laiha kapasidade ezekuta OJE

August 5, 2021
Deputada bankada CNRT, Bendita Moniz Magno, kons...

Kevin Blackstone la kontente husik TL

August 5, 2021
Embaixadór Estadu Unidu Amérika (EUA), Kevin B...

Governu seidauk rekupera estragu sira husi DN

August 4, 2021
Parlamentu Nasionál (PN) kestiona, besik ona fu...
1 2 3 625

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker