GMN TV Politika Lista kandidatura AMP, mantein ho deputadu 35 iha PN "Logo boña mean aprovadu"

Lista kandidatura AMP, mantein ho deputadu 35 iha PN "Logo boña mean aprovadu"

0 views

Prezidenti Partidu CNRT, Kay Rala Xanana Gusmão, anunsia sai ba públiku kona ba lista kandidatu membru Aliansa Maioria no Progresu (AMP) nian ne’ebé sei aprezenta ba Tribunal Rekursu iha tempu badak hodi priense kadeira iha Parlamentu Nasional (PN), nune’e bele infrenta Eleisaun Antesipada ne’ebé sei hala’o iha loron 12, fulan Maiu, tinan ne’e.

Kay Rala Xanana Gusmão haktuir, asuntu ida ne’ebé bai bain halo partidu sira haree malu matan la mos hodi sé kotuk ba malu mak, lista kanidatura.

Akordu koligasaun bele hato’o tuir lei, ba instituisaun ne’ebé mak sei tau matan no halo verifikasaun no sei fó lejitimidade ba AMP nia depózitu polítika ne’e, Kona ba kuota persentazen ba partidu ida-ida.

“Ba lista AMP nian, se konferensista sira premite, ita tuir de’it persentazen ne’ebé ita iha agora dadauk iha Parlamentu Nasional. Maibé ha’u anunsia naran balu, ba lista únika AMP nian, númeru 1, Kay Rala Xanana Gusmão, númeru 2, Taur Matan Ruak no númeru 3, Armanda Berta dos Santos,” anunsia Xanana liu husi video ne’ebé Xanana haruka mai husi Kuala Lumpur Malaysia, ba konferensista AMP nian iha Centro Conções de Dili (CCD), Kinta (22/02).

Rona tiha anunsia Xanana Gusmão nian ne’e, konferensista husi partidu tolu ne’e, hakilar hodi fó apoiu ba desizaun Xanana Gusmão nian ne’e.

Ho nune’e, lista kanidatura AMP nian husi númeru 1 to’o 3 okupa husi Prezidenti Partidu CNRT, PLP no KHUNTO, no mantein ho deputadu 35 ne’ebé agora dadauk iha Parlamentu Nasional, maibé lista 36 ba to’o 55, partidu tolu ne’e sei aumenta tan ida-ida nia kandidatura.

Hafoin konferensia nasional AMP ne’e, liu husi konferensia ba imprensa, portavoz AMP, Taur Matan Ruak, relata, konferensia Nasional  Aliansa Mudansa ba Progresu (AMP) ho moto, ‘Hamutuk Hametin Nasaun’, ho nia objetivu prinsipal mak atu halo harmonizasaun ba rezultadu konferensia nasional kada partidu tolu ne’e (CNRT, PLP no KHUNTO) nian.

Partidu CNRT, PLP no KHUNTO hala’o ona konferensia nasional ne’ebé mak involve estrutura partidu iha nivel nasional, Munisípiu no Postu Administrativu hodi diskuti no deside formatura aliansa atu la’o hamutuk iha prosesu tomak eleisaun Antesipada nian.

“Harmonizasaun polítika partidu aliansa ho nia atributu úniku, hakotu ho rezolusaun ne’ebé aprova ona husi konferensista sira husi partidu tolu ne’ebé involve iha AMP mak hanesan, afirmasaun rezultadu husi rezolusaun kada partidu nian ba konfresista konferensia nasional AMP, depois konferensia nasional partidu ida-ida hodi la’o hamutuk iha liña orientasaun polítika ida de’it, ho naran “Aliansa Mudansa ba Progresu hasoru Eleisaun antesipada,” relata Taur Matan Ruak.

Iha konferensia nasional AMP nian ne’e mós, halo aprovasaun ba logo ka emblema ne’ebé ezisti oras ne’e dadauk ho boña mean no bandeira AMP nian nu’udar rekezitus proprio tuir lei Eleisaun Parlamentar. Tamba la kontra regulamentu ruma.

Halo kompromisu polítika liu husi plataforma AMP ho objetivu atu hametin sistema demokrásia formatura polítika atu asegura Governasaun foun ne’ebé forte no estavel ba periodu 2018-2023.

Rezultadu husi deklarasaun konjunta ho aprovasaun unanimidade, hetan mós partisipasaun husi delegadu husi Munisípiu no Postu Administrativu hotu, inklui organizasaun masa partidu, observador no konvidadus liu rihun atus ida.

Mantein ho lista kandidatu AMP 35 ba eleisaun antesipada ne’e, haree ba rezultadu eleisaun parlamentar 2017 ne’ebé Partidu tolu ne’e hetan, hanesan CNRT ho kadeira 22, PLP ho kadeira 8 no KHUNTO ho kadeira 5.cos


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker