Xefi bankada partidu Congresso Nacional Reconstrução de Timor (CNRT), Duarte Nunes, deklara, difísil atu troka membru VIII Governu na’in sia (9) ne’ebé Primeiru Ministru (PM), Taur Matan Ruak, indijita ba Prezidenti Repúblika (PR), Francisco Guterres ‘Lú Olo’.
“Ha’u nia hanoin susar uitoan ita ko’alia hodi troka kandidatu membru Governu na’in sia (9), tanba ema ne’e partidu nia estrutura, ita troka tenki iha razaun, la’os troka tanba ema dehan ema ne’e na’ok te’en, ida ne’e la’os organizasaun, sé organizasaun ita atu fó valor ba ema”, Xefi bankada CNRT ne’e ba jornalista sira iha Parlamentu Nasional (PN), Kuarta (13-02-2019).
Nia esplika, kandidatu ne’ebé maka Primeiru Ministru indijita ba Xefi Estadu ne’e, militante barak maka hili atu tu’ur iha fatin ida agora no sé ema balun dehan membru Governu na’in sia (9) ne’e komete kazu ruma, tenki hatudu prova ruma.
“Ida ne’e maka regras partidu ka organizasaun, tenki hanesan ne’e kona-bá membru Governu kompetensia PM, Taur Matan Ruak, nia (PM) maka tenki ko’alia ho PR Lú Olo”, subliña Duarte Nunes.
Entretantu membru Governu na’in sia (9) ne’ebé seidauk simu pose maka Helder lopes, Sérgio Lobo, Tomás Cabral, Virgílio Smith, Antonio Verdial (Rejigna-án ona), Francisco Calbuady lay, Alfredo Pires, Jacinto Rigoberto no Amandio Benevides. Ety
