Bankada Partidu opozisaun, FRETILIN la preokupa ho membru governu ne’ebé to’o ohin loron ne’e seidauk kompletu, tanba ida ne’e kompetensia Prezidente Repúblika ho Governu nian atu rezolve.
“Membru governu seidauk kompletu ida ne’e laiha relasaun ho deputadu sira, maibe ezekutivu no Prezidente Repúblika nian”,dehan Vise Xefe Bankada Partidu Opozisaun FRETILIN, Francisco Branco, Sesta (8/2/19), iha Parlamentu Nasionál.
Iha parte seluk Deputadu bankada Partidu Demokratiku, Mariano Assanami Sabino, konsideira membru oitavu Governu ne’ebé seidauk kompleta sei fo impaktu ba ezekusaun Orsamentu Jeral Estadu tinan 2019.
Deputadu bankada PD Mariano Assanami Sabino hatete ho membru oitavu governu ne’ebé seidauk kompleta ne’e sei fo impaktu maka’as ba ezekusaun Orsamentu Jeral Estadu ne’ebé Prezidente Repúblika promulga ona, tanba Ministériu ida ne’ebé laiha nia ulun sei lori problema bo’ot.
“Mai ha’u nia impaktu ne’e maka’as teb-tebes, tanba sei Ministériu ida maka nia ulun laiha sei lori problema bo’ot, ne’e nain 9 kedas entaun presiza haree didiak para depois de promulga OJE faze tuir mai ne’e saida, tenki haree ona ida ne’e para halo kompleta, governu ida tenki kompleta para servisu diak, ezekuta diak nune bele aselera dezenvolvimentu”, preokupa deputadu PD.
Sekretariu Jerál PD ne’e dehan polítiku sira labele halimar barak liu iha politika no koalia politika barak liu, maibe povu sei kontinua moris susar, agrikultura, saude, edukasaun lao ladiak, presiza tau matan ba ida ne’e no laiha tan razaun atu muda tan ida ne’e, presiza tur no deskute hamutuk semak diak liu bele ense para Governu bele lao ba oin.Nes
