GMN TV Politika PN hein pedidu Tribunal ba levatamentu imunidade Kalbuadi ■MP tenki kontinua investiga Kalbuadi

PN hein pedidu Tribunal ba levatamentu imunidade Kalbuadi ■MP tenki kontinua investiga Kalbuadi

0 views

Prezidenti Parlamentu Nasional (PPN), Arão Noe, hateten atu hasai imunidade Deputadu CNRT, Francisco Kalbuadi Lay, to’o oras ne’e Parlamentu Nasional (PN) seidauk simu karta pedidu ruma husi Tribunal. 

“Ami to’o agora seida’uk simu karta ida husi Tribunal para halo levantamentu imunidade,” hateten, PPN Arão Noe ba ba Jornalista sira Kuarta (27/02/209), hafoin enkontru ho Prezidenti Repúblika Francisco Guterres Lú Olo, iha Palasio Prezidensial Nicolau Lobato, Bairu Pite,Dili.

Antes ne’e Deputadu Francisco Kalbuadi Lay hetan ona notifikasaun husi Ministeriu Públiku hanesan suspeitu ba kazu Brankamentu Kapitál.

Maibé, Kalbuadi Lay la kumpri notifikasaun Ministériu Públiku  hodi ba presta deklarasaun.

Entretantu, iha Segunda (25/02/2019) Kalbuadi Lay retoma fali mandatu nu’udár deputadu ne’ebé antes ne’e substitui husi deputada Virginia Ana Belo.

MP tenki kontinua investiga Kalbuadi

Jurista Timor-Oan, Manuel Tilman deklara katak, relasiona ho Sekretáriu Jeral partidu Congresso Nacional Reconstrução de Timor (CNRT), Francisco Kalbuadi Lay ninia kazu ne’e, solusaun di’ak maka Ministériu Públiku (MP) kontinua halo investigasaun no akuzasaun ba Kalbuadi maka marka fali loron ba julgamentu ninian.

“MP nia poder limitadu, maibé relasiona ho Kalbuadi nian ne’e, MP só halo de’it notifikasaun hodi informa ba Kalbuadi atu ba presta deklarasaun iha MP, tanba ne’e, sé kuandu iha prazu tinan ida (1), fulan nén (6) nia laran maka Kalbuadi nafatin la presta deklarasaun iha MP, maka Kalbuadi komete fali kazu seluk hanesan dezobediénsia ba autoridade públika, maibé MP labele halo fali mandadu detensaun, tanba mandadu detensaun tenki tuir regra no mai husi juíz ida, ho nune’e dalan ne’ebé di’ak maka MP kontinua halo de’it investigasaun no akuzasaun, hodi haruka akuzasaun Kalbuadi nian ba tribunal no wainhira akuzasaun to’o iha tribunal maka juíz prosesu marka fali loron julgamentu no Kalbuadi iha loron 15 hodi aprezenta kontextu, maibé ema ida labele ka’er nia”, Manuel Tilman ba GMN iha ninia rezidénsia, Praia dos Coqueiros-Díli, Kuarta (27-02-2019).

Nia akresenta katak, wainhira tribunal hasa’i despaixu mandadu detensaun no mandadu kapturasaun, tenki iha regra hanesan karik ema ne’e fragante de leitu ou la kumpri desizaun no sentensa ne’ebé tribunal desidi ona.

“Mandadu detensaun signifika fragante de leitu (tertangkap basah) wainhira nia halo krimi maka tribunal hatún despaixu mandadu detensaun hodi detein durante oras 72 hodi tuir prosesu primeiru interogátoriu iha tribunal ou kazu ne’e iha ona tribunal maka nia la marka prezensa dala tolu (3) iha julgamentu maka juíz fó despaixu hodi halo detensaun atu nune’e bele lori nia ba tuir julgamentu no mandadu kapturasaun normalmente depois de hatún sentensa husi tribunal liu husi juíz prosesu hodi desidi haruka ba kadeia ka la’e, sé kuandu haruka ba kadeia maka iha dalan nia hala’i tiha, entaun juíz hatún despaixu kapturasaun hodi haruka ba kadeia, maibé kazu Kalbuadi nian ne’e hahú uluk husi auto de denuncia, tanba ema balun denunsia katak, Kalbuadi halo krimi, maibé la’os dehan nia halo korupsaun tenki detein nia ne’e la’e,”esplika Tilman.

Nia subliña mós katak, kona-bá pozisaun Kalbuadi hanesan deputadu iha Parlamentu Nasional (PN) ne’e públiku labele interpreta sala situasaun ne’e, tanba Kalbuadi eleitu hanesan órgaun de soberanu la’os nomeadu, signifika pozisaun deputadu ne’e Kalbuadi nian duni.

Relasiona ho Sekretáriu Jeral partidu Congresso Nacional Reconstrução de Timor (CNRT), Francisco Kalbuadi Lay ne’ebé hetan ona karta notifikasaun husi MP, atu presta deklarasaun kona-bá prosesu balun ne’ebé iha hela faze investigasaun, maibé to’o agora pesoal refere seidauk presta deklarasaun asumi fali kna’ar hanesan deputadu, jurista Timor-Oan, Manuel Tilman hateten, MP kontinua halo investigasaun, lori akuzasaun Kalbuadi ninian ba tribunal, atu nune’e juíz prosesu bele marka loron ba julgamentu.

Husu koopera ho justisa

Nune’e mos, Observador Akadémiku, Camilio Ximenez,  husu ba Francisco Kalbuadi Lay, ne’ebé hanesan lider partidu polítiku bo’ot ida iha Timor-Leste (TL), tenki honestu hodi koopera ho justisa.

Camilio Ximenes espresa nia hanoin ne’e, relasiona ho kazu Kalbuadi Lay, ne’ebé deside hodi fila hikas ba Parlamentu Nasionál  hodi reasume fali kna’ar hanesan deputadu.

“ita hotu akompaña parte sosiedade mós preokupa lala’ok  justisa iha Timor-Leste ne’e fraku tebes, relasiona ho kazu Sekretáriu Jeral partidu CNRT, Fancisco Kalbuadi Lay. Ne’eduni presiza hatene, buat ida polítika ne’e, iha presaun barak husi públiku, maibé desizaun sira ne’e atu foti los ka la’e, persiza iha justifikasaun ne’ebe klaru ho evidénsia ne’ebé forte.  Tanba ne’e, di’ak liu Kalbuadi koopera lai ho Justisa, tanba Ministériu Públiku hasai ona karta notivikasaun ba nia atu presta deklarasaun”, hateten Camilio Ximenes ba GMN iha kampus FASPOL Vila –Verde Díli, Kuarta (27/02).

 Nia mós husu ba Francisco Kalbuadi Lay katak, nu’udar  lider partidu polítika ida, la persiza tama fali  ba  Parlamentu Nasionál, atu ema labele hamosu fali interpretasaun oi-oin.

“Di’ak liu iha liur hodi koopera ho justisa,  tanba nia (Kalbuadi), hanesan lider partidu ida,  tenki honestu atu koopera ho justisa, hodi kontribui di’ak liu tan”, katak  Camilio.

Nune’e mós Estudante Universidade Nasional Timor-Lorosa’e (UNTL), Nicolau Mendonça,  husu ba Governu no Parlamentu atu labele halo kofuzaun ba públiku kona ba Kalbuadi Lay ne’ebé tama fali ba Parlamentu Nasionál, maibé nia naranhakerek ona iha lista membru Governu ne’ebé se pendente hela.eus/ita/aba


Banner

Foto

Notisia Ikus

PPN: Singapura rejeita TL adere ba ASEAN ne’e normál

August 5, 2021
Prezidenti Parlamentu Nasional (PPN) Aniceto Gut...

FRETILIN husu Governu hadi’ak implementasaun SB

August 5, 2021
Bankada FRETILIN, sujere Governu atu avalia impl...

Governu laiha kapasidade ezekuta OJE

August 5, 2021
Deputada bankada CNRT, Bendita Moniz Magno, kons...

Kevin Blackstone la kontente husik TL

August 5, 2021
Embaixadór Estadu Unidu Amérika (EUA), Kevin B...

Governu seidauk rekupera estragu sira husi DN

August 4, 2021
Parlamentu Nasionál (PN) kestiona, besik ona fu...
1 2 3 625

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker