GMN TV Politika PR Lú Olo apela ba PN kontrola ezekusaun OJE 2019 ■ FRETILIN deskorda desizaun PR

PR Lú Olo apela ba PN kontrola ezekusaun OJE 2019 ■ FRETILIN deskorda desizaun PR

0 views

Prezidente Repúblika (PR), Francisco Guterres ‘Lú Olo’, husu ba Parlamentu Nasionál nu’udar orgaun fiskalizador atu kontrola governu iha ezekusaun Orsamentu Jerál Estadu 2019 ne’ebé promulga ona.
“Kompetensia Prezidenti Repúblika nian atu promulga ou veta, ne’e duni prezidenti promulga ona klaru orsamentu ba povu, osan ne’e povu nian ha’u husik ba ezekutivu atu ezekuta osan hodi responde nesesidade povu nian tuir sira nia planu, programa, husi fali sorin husik ba parlamentu atu halo fiskalizasaun didiak hodi osan ne’e fila duni ba povu atu hadia povu nia moris”, apela PR Lú Olo, Sesta (08/02/2019), iha Suku Lahane Osidental, hafoin kuda ai-oan iha aredores Palasio Nobre.
Xefe Estadu nee mos fo atensaun ba governu atu ezekuta Orsamentu Jeral Estadu 2019, tuir planu no programa hodi responde nesesidade povu nian.
Iha uportunidade nee Xefe Estadu hato’o ninia preokupasaun kona-ba apresisaun Parlamentu Nasional ba orsamentu OJE 2019, tamba la muda kestaun sira ne’ebe Prezidente kestiona, maibe hasai deit mak osan sosa asaun ConocoPhilips ho Shell Energy ho montante Dólar Amerikanu miliaun 650.
“Sim, sira lamuda ida ne’e intermus porsentuais sae intermus nominais osan kuaze nafatin hela deit, portantu la signifika katak hau bele konkorda ho ida ne’e, ne’ebe mak parlamentu sira halo, maibe, ha’u bele hateten katak orsamentu mak ida duni ona, sira dehan katak lori ida ne’e atu hadia povu nia moris husik ba sira mak halo ida ne’e”, lamenta Xefe Estadu.
Prezidente Repúblika promulga Lei N. 5/V-Orsamentu Jerál Estadu 2019, iha Kinta (07/02/2019), ho montante Dolar Amerikanu Billiaun 1.4. Nunee haruka ba Parlamentu Nasional.
Orsamentu Jerál Estadu 2019 ne’ebé Parlamentu nasional aprova iha 23 Dezembru 2018 ho montante Dollar Amerikanu Billaun 2,1 ne’ebé hetan veta husi Prezidente Republika iha loron 23 fulan Janeriu 2019.
Prezidente Republika veta OJE nee ho razaun, sustentabilidade finanseiru iha ameasa nia laran, orsamentu lá tuir konstituisaun no lei estruturante sira, desikilibru orsamentál ne’ebé aas tebes no laiha polítika alternative.
Parlamentu Nasional simu fali OJE vetadu nee no halo fali reapresiasaun nunee hasai tiha osan ba sosa asaun Conocphilips no Shell Energy ho motante Dólar Amerikanu millaun 650, no haruka fali fali ba Prezidente Republika hodi promulga. Orsamentu Jerál Estadu ba tinan 2019 nian ho motante Dólar Amerikanu Billaun 1.4.
FRETILIN deskorda desizaun PR
Nune’e bankada Frente Revolucionário do Timor-Leste Independente (FRETILIN) deskorda ho dezisaun Prezidenti Repúblika (PR), Francisco Guterres ‘Lú Olo’ ne’ebé promulga ona Orsamentu Jerál Estadu (OJE) 2019, tanba alokasaun OJE ba seitór edukasaun, saúde, agrikultura no infraestrutura báziku ki’ik.

“Antes Xefi Estadu promulga OJE 2019, halo audénsia ho parte hotu-hotu hodi rona sira nia hanoin, to’o ikus hasa’i desizaun hodi promulga OJE, haree ba situasaun global iha aspeitu sosiál no ekonómia polítika, PR Lú Olo hasa’i desizaun promulga OJE, FRETILIN deskorda ho dezisaun ne’e”, Vise Xefi bankada FRETILIN, Francisco Miranda Branco ba jornalista sira iha Parlamentu Nasionál (PN), Sesta (08-02-2019).

Nia esplika, Maski FRETILIN deskorda ho desizaun ne’e, maibé FRETILIN respeita desizaun PR Lú Olo ninian ne’e, tanba iha hanoin ne’ebé la hanesan no ninia (PR Lú Olo-red) hanoin haree liu ba situasaun iha rai laran.

“Governu aloka OJE 2019 ki’ik liu ba seitór importante sira hanesan seitór edukasaun, saúde, agrikultura no infraestrutura báziku la hetan prioridade orsamentu, nune’e la sufisiente atu halo dezenvolvimentu ba povu nia moris”, haktuir Vise Xefi bankada FRETILIN ne’e.

Maski nune’e deputadu bankada Partido Democrático (PD), Mariano Assanami Sabino hateten, ho promulgasaun OJE 2019 ne’e bele rezolve ona problema impase polítiku ne’ebé dau-daun ne’e akontese iha rai laran, tanba ne’e tenki apresia desizaun PR Lú Olo promulga OJE 2019.

“Ha’u hanoin fila ba Governu atu ezekuta OJE ho di-diak, hodi rezolve buat barak ne’ebé durante ne’e akontese, tanba ita hatene katak impase ida ne’e fó impaktu ba seitór hotu-hotu, ita hotu tenki esforsu halo servisu ho di’ak, PN sei hala’o funsaun no kna’ar halo fiskalizasaun no kontrolu servisu hotu hodi hadi’a fali situasaun ne’ebé maka dau-daun ne’e ita infrenta (rezultadu impase-red)”, haktuir Assanami.

Antes ne’e, Prezidenti PN, Arão Noe no PR Lú Olo deklara katak, ho promulgasaun OJE 2019, iha esperansa katak bele normaliza hikas funsionamentu Estadu.

Entretantu PR Lú Olo promulga OJE, tinan 2019 ho montante USD billiaun 1.4, iha loron hitu (7), fulan Febereiru, tinan ne’e.eus/ety


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker